రెండున్నరేళ్ల క్రితం విడుదలైన 'కెరటం' చిత్రంతో.. టాలీవుడ్ లోకి నాయికగా తొలి అడుగులు వేసింది రకూల్ ప్రీత్ సింగ్. ఆ సినిమా ఆశించిన విజయం సాధించకపోవడంతో.. ఇక్కడ సినిమాలకు కొంత విరామమొచ్చింది. మధ్యలో కొన్ని ప్రకటనల్లో.. ఇతర భాషల్లో సినిమాలు చేసుకుపోయిన ఈ నాజూకు సుందరికి ఇప్పుడిప్పుడే తెలుగు సినిమాల్లో అవకాశాలు దక్కుతున్నాయి. సందీప్ కిషన్ సరసన 'వెంకటాద్రి ఎక్స్ ప్రెస్' కోసం.. ఆది సరసన 'రఫ్' కోసం ఈ ముద్దుగుమ్మ ఆడిపాడుతోంది.

వీటిలో 'వెంకటాద్రి ఎక్స్ ప్రెస్' ఈ శుక్రవారం (నవంబర్ 29) ప్రేక్షకుల ముందుకు రానుంది. ఈ సినిమాపై రకూల్ చాలా ఆశలనే పెట్టుకుంది. ఇందులో ప్రార్థన అనే యువతి పాత్రలో తాను నటించానని.. ఆ పాత్ర యువతకి బాగా కనెక్ట్ అవుతుందని చెప్పుకొచ్చింది అమ్మడు. 'వెంకటాద్రి ఎక్స్ ప్రెస్'తో హిట్ దొరికితే తన కెరీర్ వేగమందుకుంటుందన్న ఆశాభావంతో ఉన్న రకూల్ ప్రీత్ సింగ్ కి.. ఎలాంటి ఫలితం దొరుకుతుందో తెలియాలంటే రేపటి వరకు ఆగాల్సిందే.