ప్రివ్యూ: మా అబ్బాయి ఇంజినీరింగ్ స్టూడెంట్

ఇదివరకు వందేమాతరం శ్రీనివాస్ డైరెక్ట్ చేసిన 'బద్మాష్' సినిమాతో పరిచయమైన నాగసిద్ధార్థ హీరోగా నటించిన సినిమా 'మా అబ్బాయి ఇంజినీరిగ్ స్టూడెంట్'. గుత్తుల శ్రీనివాస్ దర్శకత్వం వహించిన ఈ సినిమా ద్వారా రాధిక నాయికగా పరిచయమవుతోంది. సాయి సద్యోజాత పిక్చర్స్, వెంకట నాగసాయికృష్ణ క్రియేషన్స్ పతాకాలపై డి.వి. చలం, దంటు వెంకటగోపాలరావు సంయుక్తంగా నిర్మించారు.

గేయ రచయిత చిన్నిచరణ్ సంగీతం సమకూర్చిన ఈ సినిమా పాటలు ప్రజాదరణ పొందుతున్నాయని నిర్మాతలు తెలిపారు. "మా సినిమా బాగున్నదని సెన్సార్ సభ్యులు ప్రశంసించడం ఆనందంగా ఉంది. ప్రేమ, వినోదం, సందేశం మేళవింపుతో ఈ చిత్రాన్ని రూపొందించాం. నాగసిద్ధార్థ బాగా నటించాడు. అతనికి మంచి భవిష్యత్తు ఉంది" అని దర్శకుడు చెప్పారు. తొలి సినిమాతో విజయం సాధించలేకపోయిన నాగసిద్ధార్థ ఈ సినిమాపై నమ్మకం పెట్టుకున్నాడు.

భరత్, ఆహుతి ప్రసాద్, కృష్ణభగవాన్, వైజాగ్ ప్రసాద్, కొండవలస, హేమ, నాగినీడు, కొండూరి రామ్మోహనరావు తారాగణమైన ఈ చిత్రానికి మాటలు: మరుధూరి రాజా, సంగీతం: చిన్నిచరణ్, ఛాయాగ్రహణం: రాజేంద్ర, సహ నిర్మాతలు: డి. కృష్ణకిశోర్, డి. కృష్ణస్వామి.