'கயல்' படத்தை அடுத்து பிரபுசாலமன் இயக்கவுள்ள அடுத்த படத்தில் தனுஷ் மற்றும் கீர்த்தி சுரேஷ் நடிக்கவுள்ளனர் என்பது ஏற்கனவே அறிந்ததே. தற்போது இந்த படத்தில் கமல் மற்றும் ரஜினியுடன் நடித்த பிரபல நகைச்சுவை நடிகர் சின்னிஜெயந்த் நடிக்கவுள்ளதாக தகவல்கள் வந்துள்ளது.

இதுகுறித்து சமீபத்தில் பேட்டியளித்த சின்னி ஜெயந்த், முதன்முதலாக பிரபுசாலமன் இயக்கத்தில் தந்தை வேடத்தில் நடிக்கவுள்ளேன். இந்த படத்திற்காக என்னுடைய லுக்கை முற்றிலும் மாற்ற இருக்கின்றேன். இந்த படத்தில் வரும் எனது கேரக்டரின் லுக், கிட்டத்தட்ட 'பிக்கு' படத்தில் வரும் அமிதாப்பின் லுக்கை போன்று இருக்கும்' என்று கூறியுள்ளார். பிரபுசாலமனின் முந்தைய படத்தின் நாயகியான ஆனந்தியும் இந்த படத்தில் ஒரு முக்கிய கேரக்டரில் நடிக்கின்றார் என்பது குறிப்பிடத்தக்கது.

படத்தின் பெரும்பாலான காட்சிகள் ரயிலில் படமாக்கப்படவுள்ள இந்த படத்தில் சண்டைக்காட்சிகள் மிகவும் தத்ரூபமாக வரவேண்டும் என்பதற்காக ஹாலிவுட்டில் பல படங்களுக்கு பணியாற்றிய ரோஜர் யுவான் சண்டைப்பயிற்சியாளராக ஒப்பந்தமாகியுள்ளார். டி.இமான் இசையமைக்கவுள்ள இந்த படத்தில் வி.மகேந்திரன் ஒளிப்பதிவு செய்யவுள்ளார். சத்யஜோதி பிலிம்ஸ் சார்பில் தியாகராஜன் தயாரிக்கவுள்ள இந்த படத்தின் படப்பிடிப்பு விரைவில் தொடங்கவுள்ளது.