கமல்ஹாசன் மிக விரைவில் அரசியல் கட்சி ஆரம்பித்தோ அல்லது ஏற்கனவே உள்ள அரசியல் கட்சியிலோ இணைந்தோ மிக விரைவில் தீவிர அரசியலில் ஈடுபடுவார் என்று எதிர்பார்க்கப்படும் நிலையில் அவர் சிபிஎம் என்ற கம்யூனிஸ்ட் கட்சியில் சேரப்போவதாக வதந்தி எழுந்துள்ளது. பாஜகவின் மூத்த தலைவர் சுப்பிரமணியன் சுவாமி இதனை தனது டுவிட்டரில் குறிப்பிட்டிருந்தார்.

இந்த நிலையில் கேரளாவில் உள்ள கோழிக்கோட்டில் சிபிஎம் கட்சியின் விழா ஒன்று நடைபெறவுள்ளது. கேரள முதல்வர் பினராயி விஜயன் தலைமையில் நடைபெறவுள்ள இந்த விழாவுக்கு கமல்ஹாசன் தனது டுவிட்டரில் வாழ்த்து தெரிவித்துள்ளார்.

கேரளாவில் நடைபெறவுள்ள சிபிஎம் கட்சி விழாவில் கலந்து கொள்ள தனக்கு அழைப்பு விடுக்கப்படவில்லை என்றும், தான் அக்டோபர் இறுதி வரை சனிக்கிழமைகளில் பிக்பாஸ் நிகழ்ச்சியில் பிசியாக இருப்பதாகவும் தெரிவித்த கமல், இருப்பினும் சிபிஎம் கட்சியின் விழாவுக்கு தனது வாழ்த்துக்களை தெரிவித்து கொள்வதாக தெரிவித்துள்ளார். 

கம்ப்யூனிஸ்ட் கட்சியில் கமல் இணைய வாய்ப்பு இருப்பதாக கூறப்படும் நிலையில் அவர் அந்த கட்சியின் விழாவிற்கு வாழ்த்து தெரிவித்தது மேலும் ஊகங்களை அதிகரித்துள்ளது.