മോഹൻലാലിന്റെ എവർഗ്രീൻ ചിത്രം സ്‌ഫടികം വീണ്ടും തിയേറ്ററുകളിൽ എത്തുന്നു. മോഹൻലാലിന്റെ ജന്മദിനമായ മേയ് 21ന് ചിത്രം വീണ്ടും റിലീസ് ചെയ്യാൻ തയ്യാറെടുക്കുന്നത് അദ്ദേഹത്തിന്റെ ആരാധകരാണ്. ഡിജിറ്റൽ ഫോർമാറ്റിലാണ് സ്ഫടികം തിയേറ്രറിലെത്തിക്കുക. ചാക്കോ മാഷിന്റെയും മകൻ ആടുതോമയുടെയും കഥ പറഞ്ഞ സ്‌ഫടികം മോഹൻലാലിന്റെ അഭിനയജീവിതത്തിലെ നിർണായക ചിത്രങ്ങളിൽ ഒന്നാണ്. സ്ഫടികത്തിലെ ആക്ഷൻ രംഗങ്ങളും ഏറെ കൈയടി നേടി. തിലകൻ, കെ.പി.എ.സി ലളിത, നെടുമുടി വേണു, രാജൻ പി ദേവ്, ഭീമൻ രഘു, മണിയൻ പിള്ള രാജു എന്നിവരും മികച്ച പ്രകടനത്തിലൂടെ പ്രേക്ഷക ശ്രദ്ധ നേടി. ചിത്രത്തിലെ വില്ലനായെത്തിയ ജോർജ് പിന്നീട് സ്ഫടികം ജോർജ് എന്ന പേരിൽ മലയാളത്തിലെ മുൻനിര വില്ലനായി തിളങ്ങി.