'தனி ஒருவன்' படத்தின் மூலம் மீண்டும் கோலிவுட்டில் ரீ எண்ட்ரி ஆன அரவிந்தசாமி, ஜெயம் ரவியுடன் மீண்டும் இணைந்து நடித்த 'போகன்' திரைப்படம் நாளை உலகம் முழுவதும் வெளியாகவுள்ளது.

மேலும் அவர் நடிக்கவுள்ள 'சதுரங்க வேட்டை' படத்தின் ஆரம்பகட்ட பணிகள் நடந்து வருகிறது. இந்நிலையில் அரவிந்தசாமி நடிக்கவுள்ள மற்றொரு படத்தின் தகவல் தற்போது வெளிவந்துள்ளது.

ஏற்கனவே அரவிந்தசாமி நடித்த 'புதையல்' உள்பட ஒருசில படங்களை இயக்கிய செல்வா, தற்போது 'வணங்காமுடி' என்ற படத்தை இயக்கவுள்ளார். இந்த படத்தின் நாயகனாக அரவிந்தசாமியும், அவருக்கு ஜோடியாக ரித்திகாசிங்கும் நடிக்கவுள்ளதாக வெளிவந்த செய்தியினை ஏற்கனவே பார்த்தோம்.

இந்நிலையில் இந்த படத்தில் தற்போது நந்திதா முக்கிய கேரக்டரில் நடிக்கவுள்ளார். மேலும் 'தனி ஒருவன்' படத்தில் அரவிந்தசாமிக்கு தந்தையாக நடித்த தம்பிராமையாவும் இந்த படத்தில் இணைகிறார். மேலும் ஒரு பெண் கேரக்டர் உள்பட மற்ற நடிகர், நடிகைகள், தொழில்நுட்ப கலைஞர்களின் தேர்வு நடைபெற்று வருவதாகவும், இந்த படத்தின் படப்பிடிப்பு வரும் 14ஆம் தேதி தொடங்கவுள்ளதாகவும் செய்திகள் வெளிவந்துள்ளது.