தமிழகத்தில் தற்போது ஏற்பட்டுள்ள அரசியல் குழப்பத்திற்கு என்று விடை கிடைக்கும் என்று தமிழக மக்கள் அனைவரும் ஆர்வத்துடன் காத்திருக்கின்றனர். இந்நிலையில் இரு அணிகளாக பிரிந்திருக்கும் அதிமுக தலைவர்கள் சசிகலாவுக்கும், தமிழக முதல்வர் ஓ.பன்னீர்செல்வம் அவர்களுக்கும் பலர் தங்களுடைய ஆதரவை தெரிவித்து வருகின்றனர்.

குறிப்பாக முதல்வர் ஓபிஎஸ் அவர்களுக்கு எம்.எல்.ஏக்கள், எம்பிக்கள், திரையுலகினர் மற்றும் பிற அரசியல் கட்சி தலைவர்கள் அவரது இல்லத்தை தேடி வந்து தினந்தோறும் சந்தித்து தங்கள் ஆதரவை தெரிவித்து வருகின்றனர். இந்நிலையில் இன்னும் சற்று நேரத்தில் முதல்வர் ஓபிஎஸ் அவர்களை பிரபல நடிகரும், ஜல்லிக்கட்டு போராட்டத்திற்கு ஆதரவு கொடுத்தவர்களில் ஒருவருமான ராகவா லாரன்ஸ் சந்திக்க உள்ளதாக செய்திகள் வெளிவந்துள்ளது.

ஆனால் இவர் முதல்வரை சந்திப்பது வேறு ஒரு காரணத்திற்காக என்பது குறிப்பிடத்தக்கது. ஏற்கனவே ஜல்லிக்கட்டு வெற்றி கொண்டாட்டத்தை லாரன்ஸ் அவர்கள் வரும் 18ஆம் தேதி மாலை 7 மணி முதல் 7.15 மணி வரை அனைவரும் மொட்டை மாடியிலோ அல்லது வீட்டிற்கு வெளியிலோ, அலைபேசியில் டார்ச் அடித்தோ அல்லது மெழுகுவர்த்தி ஏந்தியோ அமைதியாக கொண்டாடுவோம் என்று அறிவித்துள்ளார். இந்த கொண்டாட்டத்திற்கு முதல்வர் ஓபிஎஸ் அவர்களும் ஆதரவு கொடுக்க வேண்டும் என்று வேண்டுகோள் விடுக்கவே இன்னும் சற்று நேரத்தில் ராகவா லாரன்ஸ் முதல்வரை சந்திக்கவுள்ளாராம்.

முதல்வரை மட்டுமின்றி எதிர்க்கட்சி தலைவர் மு.க.ஸ்டாலின், மத்திய அமைச்சர் பொன்.ராதாகிருஷ்ணன் உள்பட பல தலைவர்களையும் ராகவா லாரன்ஸ் சந்திக்க திட்டமிட்டுள்ளாராம். அவரது சந்திப்பு லிஸ்ட்டில் சசிகலா பெயர் உள்ளதா? என்பதை பொறுத்திருந்து பார்ப்போம்.