close
Choose your channels

సైకిల్ తొక్కుతూ వెళ్లి.. శవంగా తిరిగొచ్చింది..

Friday, September 18, 2020 • తెలుగు Comments
Listen to article
--:-- / --:--
1x
This is a beta feature and we would love to hear your feedback?
Send us your feedback to audioarticles@vaarta.com

అందం.. అల్లరి కలగలిపి కూతురి రూపంలో తమ కళ్ల ముందు తిరుగుతుంటే.. ఆ తల్లిదండ్రుల ఆనందానికి అవధుల్లేకుండా పోయాయి. కూతురి సంతోషం కోసం సైకిల్ కొనిచ్చి.. ఆనందంగా తమ కళ్లు ముందు తొక్కుతుంటే మురిసిపోయారు. అంతా హ్యాపీగా సాగుతున్న వారి జీవితంలో పెను విషాదం. అప్పటి వరకూ తమ కళ్ల ముందే సైకిల్ తొక్కుతూ కనిపించిన చిన్నారి అదృశ్యమైంది. వెదికి వేసారిన ఆ తల్లిదండ్రులు పోలీసులను ఆశ్రయించారు. చివరకు.. సంతోషంగా.. చెలాకీగా తమ కళ్ల ముందు తిరిగిన ముద్దుల కూతురు విగత జీవిగా ఓ నాలాలో కనిపించడంతో ఆ తల్లిదండ్రుల గుండె పగిలింది..

అసలు విషయంలోకి వెళితే.. హైదరాబాద్ మల్కాజిగిరి నేరెడీమేట్ సంతోషిమా కాలనీకి చెందిన సుమేధ కపురియా(12)ను గురువారం సాయంత్రం వర్షం లేకపోవడంతో ఆమె తల్లిదండ్రులు సైకిల్ తొక్కుకునేందుకు అనుమతించారు. అయితే ఎంత సేపైనా ఇంటికి రాకపోవడంతో తల్లిదండ్రులు ఆందోళనకు గురయ్యారు. ఎక్కడ వెదికినా కూతురి జాడ తెలియకపోవడంతో పోలీసులకు ఫిర్యాదు చేశారు. వెంటనే విచారణ చేపట్టిన పోలీసులు కొన్ని గంటల్లోనే పాప జాడ కనుక్కున్నారు. అయితే ఆ పాప విగతజీవిగా కనిపించడం తీవ్ర విషాదాన్ని నింపింది.

గురువారం సాయంత్ర కురిసిన భారీ వర్షానికి పక్కనే ఉన్న దీన్ దయాల్ నగర్‌లోని నాళాలు పొంగి పొర్లాయని స్థానికులు పోలీసులకు తెలిపారు. దీంతో వెంటనే అక్కడికి చేరుకున్న పోలీసులు సుమేధ సైకిల్‌ను నాలా వద్ద గుర్తించారు. వెంటనే రెస్క్యూ టీం తో పాటు జీహెచ్ఎంసీ కూడా రంగంలోకి దిగింది. తీవ్ర స్థాయిలో గాలింపులు జరపగా.. సుమేధ మృతదేహం అక్కడకు రెండు కిలోమీటర్ల దూరంలోని బండ చెరువులో లభ్యమైంది. కూతురిని విగతజీవిగా చూసిన సుమేధ తల్లిదండ్రులు కన్నీరుమున్నీరుగా విలపిస్తున్నారు. దీంతో సంతోషిమానగర్‌లో తీవ్ర విషాదం నెలకొంది.

Follow @ Google News: గూగుల్ న్యూస్ పేజీలోని ఇండియాగ్లిట్జ్ తెలుగు వెబ్‌సైట్‌ను అనుసరించడానికి మరియు వెంటనే వార్తలను తెలుసుకోవడాని ఇక్కడ క్లిక్ చేయండి.