‘పీవీ సింధును కిడ్నాప్ చేసి పెళ్లాడుతా..’ అని టైటిల్ చూసి ఆశ్చర్యపోతున్నారా..? అవును మీరు వింటున్నది నిజమే. అంతే కాదండోయ్ ఈ మాటలు అన్నది ఎవరో కాదు.. పండు ముసలోడు.!. అన్నీ అయిపోయిన వయస్సులో తాతకు ఈ వింత కోరిక పుట్టింది. ఓ లేఖ రూపంలో ఆ ముదుసలి తాత తన మనసులోని మాటను బయటపెట్టాడు. ఇవన్నీ అటుంచితే.. ఆ తాత బ్యాట్మింటన్ క్రీడాకారిణి పీవీ సింధుకు వీరాభిమాని. ఇలా పెళ్లి చేసుకుంటానని కలెక్టర్‌కు ఆయన లేఖ రాశాడు. ఇంతకీ ఆయనెవరు..? ఎందుకీ వింత కోరిక పుట్టింది..? అనే విషయాలు ఈ ప్రత్యేక కథనంలో చూద్దాం.

నవ్వుకున్న జనాలు!

ఇదిగో ఈ ఫొటోలోని వ్యక్తి తమిళనాడులోని రామనాథపురంకు చెందినవారు. జిల్లా కలెక్టర్ వీర రాఘవరావు ఆధ్వర్యంలో ప్రజాదర్బార్ జరుగుతుండగా.. ఓ వృద్ధుడు వచ్చి సింధుతో పెళ్లి చేయాలని అర్జీ పెట్టుకున్నాడు. అయితే ఈ లేఖ చూసిన కలెక్టర్ కార్యాలయ సిబ్బంది పడిపడి నవ్వుకున్నారట.. మరికొందరు షాకయ్యారు. అంతేకాదు కొంతమంది దాన్ని ఫొటోతీసి సోషల్ మీడియా ద్వారా షేర్ చేశారు. దీంతో ఈ వ్యవహారం సోషల్ మీడియాలో హాట్ టాపిక్ అయ్యింది.

లేఖలో ఏముంది..!?

‘నా పేరు మలచమి. నేను 2004లో జన్మించాను. నేను ఈ భూమ్మీద ఉన్న దుష్టశక్తులను నాశనం చేయడం కోసం నేను అవతారంగా పుట్టాను. నా వయస్సు ప్రస్తుతం 16 ఏళ్లు. నాలాంటి వ్యక్తులు యుక్త వయస్సులో, అందంగా ఉండే పీవీ సింధూలాంటి క్రీడాకారిణిని పెళ్లి చేసుకోవాలి. అందుకే.. నేను సింధును కిడ్నాప్ చేయబోతున్నా.. ఈ పని చేయడానికి కలెక్టర్ సహకారం కావాలి’ అని మలచమి లేఖలో రాసుకొచ్చారు. ఫిర్యాదులో సింధు, మలచమి ఫొటోలు అతికించాడు.

సింధు స్పందిస్తుందా!?

ఇదిలా ఉంటే.. ఇది వినడానికి కాస్త నవ్వుకున్నా ఈ వ్యవహారం ఎంతవరకూ వెళ్తుందో మరి. అయితే దీనిపై సింధు ఎలా రియాక్ట్ అవుతుందో లేకుంటే అబ్బే దీనికి రియాక్షన్ అవసరమా..? అని మిన్నకుండిపోతుందా..? కనీసం మీడియా ముందు కాకుండా సోషల్ మీడియా ద్వారా అయినా స్పందిస్తుందేమో వేచి చూడాల్సిందే మరి.