எனக்கு கொரோனா வந்துவிட்டது, நான் கண்டிப்பாக உயிர்பிழைக்க மாட்டேன், அதனால் தற்கொலை செய்துகொள்ள போகிறேன் என மனைவியிடம் டயலாக் பேசிய கணவர் ஒருவர் கள்ளக்காதலியுடன் வேறு மாநிலத்திற்குத் தப்பிச்சென்ற விவகாரம் மும்பையில் நடைபெற்றிருக்கிறது. மகாராஷ்டிரா மாநிலம் நவி மும்பையில் உள்ள ஒரு தனியார் நிறுவனத்தில் வேலைப்பார்த்து வந்தவர் மனிஷ் மிஸ்ரா. இவர் தனது மனைவியுடன் நவி மும்பை பகுதியில் உள்ள குடியிருப்பு பகுதியில் வசித்து வருந்ததாகக் கூறப்படுகிறது.

இந்நிலையில் கடந்த ஜுலை 24 ஆம் தேதி தனது மனைவியை செல்போனில் தொடர்பு கொண்ட மிஸ்ரா எனக்கு கொரோனா பாதிப்பு இருக்கிறது, நான் உயிர்பிழைக்க மாட்டேன், அதனால் தற்கொலை செய்துகொள்ள போகிறேன் எனக் கூறிவிட்டு தொலைபேசியை துண்டித்து இருக்கிறார். இதனால் பதறிப்போன அப்பெண் மீண்டும் மிஸ்ராவை தொலைபேசியில் தொடர்பு கொள்ள முயற்சித்து இருக்கிறார். ஆனால் செல்போன் ஸ்விட்ச் ஆப் என வந்திருக்கிறது.

எனவே தனது கணவனை காணவில்லை என போலீஸில் புகார் கொடுத்து இருக்கிறார். அதையடுத்து செல்போனில் கிடைத்த சிக்னலை வைத்து இறுதியாக மிஸ்ரா பேசிய இடத்தைப் போலீசார் கண்டுபிடித்து உள்ளனர். அந்த இடத்தில் மிஸ்ராவின் பைக் மற்றும் ஹெல்மெட் கிடப்பதைப் பார்த்து முதலில் அதிர்ந்து போயுள்ளனர். தொடர்ந்து பக்கத்தில் உள்ள சிசிடி கேமரா காட்சிகளை ஆய்வுசெய்த போலீசார் மிஸ்ரா தற்கொலை செய்துகொள்ளாமல் ஒருபெண்ணின் காரில் ஏறிச்செல்வதைக் கண்டுபிடித்து உள்ளனர்.

மேலும், சிசிடி கேமரா காட்சியை வைத்து விசாரணை மேற்கொண்டதில் மிஸ்ராவிற்கும் இன்னொரு பெண்ணிற்கும் ஏற்கனவே கள்ளத்தொடர்பு இருந்திருப்பதையும் கண்டுபிடித்து உள்ளனர். அவர்கள் இருவருக்கும் ஏற்கனவே பழக்கம் இருந்ததும் அதையடுத்து தனியாக குடித்தனம் நடத்த முயற்சித்ததும் விசாரணையில் தெரியவந்துள்ளது. இதனால் மும்பை போலீஸ் தற்போது மனிஷ் மிஸ்ராவைத் தேடிக்கொண்டு மத்தியப் பிரதேசத்திற்கு விரைந்து இருக்கிறது என்பதும் குறிப்பிடத்தக்கது.