சூப்பர் ஸ்டார் ரஜினிகாந்த் நடிப்பில், நெல்சன் இயக்கத்தில் உருவாகும் ’ஜெயிலர் 2’ படத்தின் படப்பிடிப்பு தொடங்கியுள்ள நிலையில், இந்த படத்தில் ஒரு மாஸ் நடிகர் இணையாக இருப்பதாக கூறப்படுகிறது.

’ஜெயிலர் 2’ படத்தின் படப்பிடிப்பு சமீபத்தில் தொடங்கியதாக சன் பிக்சர்ஸ் நிறுவனம் அதிகாரப்பூர்வமாக அறிவித்தது. இந்த நிலையில், படப்பிடிப்பு சென்னை ராயப்பேட்டையில் உள்ள திரையரங்கம் ஒன்றில் தொடங்கியுள்ளதாகவும், ரஜினியின் காட்சிகள் தற்போது படமாக்கப்பட்டு வருவதாகவும் தகவல்கள் வெளியாகியுள்ளன.

இந்த இடத்தில் 15 நாட்கள் வரை படப்பிடிப்பு நடைபெற உள்ளதாகவும், அதன்பின் ஈசிஆர்-இல் உள்ள முக்கிய இடத்தில் தொடர்ந்து படப்பிடிப்பு நடக்க இருப்பதாகவும் கூறப்படுகிறது.

’ஜெயிலர் ’ முதல் பாகத்தில் மோகன்லால், சிவராஜ்குமார், ஜாக்கி ஷராப் போன்ற மல்டி-ஸ்டார் நடிகர்கள் நடித்திருந்த நிலையில், இரண்டாம் பாகத்திலும் அவர்கள் நடிக்க இருப்பதாக தகவல்கள் தெரிவிக்கின்றன.

மேலும், இந்த படத்தில் தெலுங்கு திரை உலகின் மாஸ் நடிகர் பாலகிருஷ்ணா இணைகிறார் என கூறப்படுகிறது. முதல் பாகத்திலேயே அவர் நடிக்க வேண்டியது, ஆனால் சில காரணங்களால் அது முடியவில்லை. இந்த நிலையில், இரண்டாவது பாகத்தில் அவருக்கு ஒரு பெரிய ரோலை நெல்சன் வழங்கியுள்ளார் என்று கூறப்படுகிறது. எனவே, இந்த படம் 'ஜெயிலர்' படத்தை விட மிகப்பெரிய வெற்றி பெறும் என எதிர்பார்க்கப்படுகிறது.

அதே போல், முதல் பாகத்தில் தமன்னா ஒரு பாடலுக்கு நடனம் ஆடியது போல, இரண்டாம் பாகத்திலும் பிரபல நடிகை ஒருவர் நடனமாட இருப்பதாகவும், இதற்கான பேச்சுவார்த்தை நடைபெற்று வருவதாகவும் தகவல்கள் வெளியாகியுள்ளன.