టాలీవుడ్ వివాదాస్పద దర్శకుడు రామ్‌గోపాల్ వర్మ తెరకెక్కించిన ‘అమ్మరాజ్యంలో కడపబిడ్డలు’ చిత్రం ఎన్నో వివాదాల మధ్య రిలీజ్ అయిన సంగతి తెలిసిందే. రిలీజ్‌కు కొన్ని గంటల ముందు సెన్సార్ బోర్డు గ్రీన్ సిగ్నల్ ఇవ్వడంతో గురువారం నాడు డిసెంబర్-12న థియేటర్లలోకి వచ్చింది. అయితే ఈ సినిమా రకరకాలుగా టాక్‌ నడుస్తోంది. ఈ సినిమా సూపర్బ్ అని కొందరు.. అబ్బే దీన్ని సినిమా అంటారా..? దీనికంటే జబర్దస్త్ కామెడీ షో బెటర్ అని మరికొందరు తమదైన శైలిలో స్పందిస్తున్నారు. అయితే ఈ సినిమాపై తాజాగా ‘అమ్మరాజ్యం..’లో నటించిన చంద్రబాబు పోలిన వ్యక్తి (ధనుంజయ ప్రభు) తన అభిప్రాయాన్ని పంచుకున్నారు. ఓ థియేటర్‌ వద్ద మీడియా మిత్రులు పలకరించగా ఇలా చెప్పుకొచ్చాడు.

కామెడీ సినిమాగానే చూడండి!

‘పబ్లిక్ రెస్పాన్స్ బాగుంది. ఈ చిత్రం విజయవంతంగా ప్రదర్శింపబడుతుందన్న నమ్మకం నాకుంది. అమ్మ రాజ్యంలో.. హాస్య చిత్రాన్ని ప్రతిఒక్కరూ చూడాలని కోరుకుంటున్నాను. ఈ చిత్రాన్ని రాజకీయ కోణంలో చూడొద్దండి’ అని ధనుంజయ చెప్పుకొచ్చారు. కాగా.. కొత్త చిత్రాల్లో నటిస్తారా? అని మీడియా ప్రతినిధులు ప్రశ్నించగా.. తెలుగు సినిమాల్లో నటించే అవకాశం వస్తే ఏ పాత్రలో అయినా నటించడానికి తాను రెడీగా ఉన్నానని తెలిపారు. కాగా.. ఇటీవలే రియల్ చంద్రబాబును కలిసి ఆటోగ్రాఫ్ తీసుకోవాలని రీల్ చంద్రబాబు‌కు ఉందని ఇటీవలే ట్విట్టర్ వేదికగా ఆర్జీవీ ట్విట్టర్‌లో పేర్కొన్న సంగతి తెలిసిందే.