நடிகர் விவேக் மனைவி கோரிக்கை நிறைவேற்றம்: தமிழக அரசின் அரசாணை
- IndiaGlitz, [Sunday,May 01 2022]
சமீபத்தில் தமிழக முதல்வர் முக ஸ்டாலின் அவர்களை சந்தித்த மறைந்த நகைச்சுவை நடிகர் விவேக்கின் மனைவி கோரிக்கை ஒன்றை அளித்த நிலையில் அந்த கோரிக்கையை நிறைவேற்றும் வகையில் தமிழக அரசு அரசாணை வெளியிட்டுள்ளது.
சமீபத்தில் தமிழக முதல்வர் முக ஸ்டாலின் அவர்களை நடிகர் விவேக்கின் மனைவி அருள்செல்வி சந்தித்தார். இந்த சந்திப்பின்போது விவேக் வாழ்ந்த வீடு அமைந்துள்ள சாலைக்கு விவேக்கின் பெயரை சூட்ட வேண்டும் என்ற கோரிக்கையுடன் கூடிய மனுவை அளித்தார். இந்த கோரிக்கை பரிசீலிக்கப்படும் என தமிழக முதல்வர் கூறியதாக செய்திகள் வெளியானது.
இந்த நிலையில் நேற்று சென்னை விருகம்பாக்கத்தில் நடைபெற்ற நிகழ்ச்சி ஒன்றில் பேசிய தமிழக சுகாதாரத்துறை அமைச்சர் சுப்பிரமணியன் அவர்கள், ‘மறைந்த நடிகர் விவேக் மனைவி அருள்செல்வி அவர்களின் கோரிக்கையை ஏற்று தமிழக முதல்வர் முக ஸ்டாலின் அவர்கள், விவேக் வசித்த தெருவுக்கு அவரது பெயரை சூட்டி அரசாணை வெளியிட உத்தரவிட்டுள்ளார் என்றும் மே மாதம் மூன்றாம் தேதி விவேக் பெயர் கொண்ட தெருவின் பெயர் பலகை திறப்பு விழா நிகழ்ச்சி நடைபெற உள்ளதாகவும் கூறினார்.