సాయిపల్లవికి ‘సినిమా’ కష్టాలు.. మారువేషంలో సర్కార్ వారి పాట థియేటర్‌కి, వీడియో వైరల్
- IndiaGlitz, [Monday,May 16 2022]
సెలబ్రెటీల జీవితం విలాస వంతంగా వుంటుందని , రాచమర్యాదలు, అందమైన జీవితమేనని అంతా భావిస్తారు. కానీ ఇది నాణేనికి ఒకవైపు మాత్రమే. పబ్లిక్‌లోకి రావడానికి సెలబ్రెటీలు ఎంతో ఇబ్బంది పడతారు. వచ్చింది ఫలానా వ్యక్తి అని ఏ మాత్రం అనుమానం వచ్చినా జనాలు చుట్టుముట్టేస్తారు. అందుకే పబ్లిక్‌ లైఫ్‌ను సెలబ్రెటీలు ఎంజాయ్ చేయలేరు. అత్యవసరమైతేనే మారు వేషాల్లోనే బయటకు వస్తారు. తాజాగా ఇలాంటిదే ఓ ఉదాహరణ వెలుగులోకి వచ్చింది. నేచురల్ బ్యూటీ సాయిపల్లవి ఒక సినిమా చూడటానికి సాహసం చేయాల్సి వచ్చింది.
వివరాల్లోకి వెళితే... సూపర్‌స్టార్ మహేశ్ బాబు, కీర్తి సురేష్ జంటగా నటించిన ‘‘సర్కార్ వారి పాట’’ సినిమా చూడటానికి వచ్చింది సాయిపల్లవి. అనంతరం సినిమా అయిపోయాక ముసుగు వేసుకుని , మాస్క్ ధరించి, ఫోన్ మాట్లాడుతూ హైదరాబాద్‌లోని పీవీఆర్ ఆర్కే సినీప్లెక్స్ నుంచి బయటకు వెళ్లిపోయింది. ఇందుకు సంబంధించిన వీడియో ప్రస్తుతం సోషల్ మీడియాలో వైరల్ అవుతోంది.
అయితే సాయిపల్లవి ఇలా సాహసాలు చేయడం ఇదే తొలిసారి కాదు. గతంలో నానితో కలిసి నటించిన శ్యామ్ సింగరాయ్ చిత్రాన్ని ఆమె మారు వేషంలో ప్రేక్షకులతో పాటు చూశారు. బుర్కా ధరించి థియేటర్‌కి వచ్చిన సాయి పల్లవిని తిరిగి ఇంటికి వెళ్లబోయే ముందు అక్కడున్న జనాలు గుర్తించారు. అయినప్పటికీ వాళ్లందరినీ పలకరిస్తూ కారులో వెళ్ళిపోయింది.
ఇక సినిమాల విషయానికి వస్తే.. సాయిపల్లవి నటించిన విరాటపర్వం విడుదలకు సిద్ధమైంది. చాలా కాలంగా షూటింగ్ జరుపుకుంటున్న ఈ చిత్రంలో రానా హీరోగా నటిస్తున్నారు. దీనికి వేణు ఉడుగుల దర్శకత్వం వహిస్తున్నారు.. ఇందులో ప్రియమణి కీలక పాత్ర చేస్తున్నారు. అలాగే ‘గార్గి’ పేరుతో మల్టీ లింగ్వల్ మూవీ సాయి పల్లవి చేస్తున్నారు.