நடிகை சோனா தனது வெப் தொடரின் ஹார்ட் டிஸ்கை மீட்டுத் தர வேண்டும் என்று ஒரே ஒரு நாள் பெப்சி யூனியன் அலுவலகம் முன் போராட்டம் நடத்தினார். தற்போது, இந்த பிரச்சனை முடிவுக்கு வந்துள்ளதாக தகவல்கள் வெளியாகியுள்ளன.

சோனா தயாரிப்பில் உருவான ’ஸ்மோக்’ என்ற வெப் தொடர் ஹார்ட் டிஸ்க்கை, அவரது மேனேஜர் கைப்பற்றிக் கொண்டதாகவும், அதை வழங்க வேண்டும் என்றால் பணம் கேட்டு மிரட்டியதாகவும், அவர் குற்றம் சாட்டினார். இதனால், திடீரென பெப்சி அலுவலகம் முன் கடந்த இரண்டு நாட்களுக்கு முன்பு போராட்டம் நடத்தினார். இது குறித்து அவர் அளித்த பேட்டி இணையதளங்களில் வைரலானது.

இந்த நிலையில், இந்த பிரச்சனை தற்போது முடிவுக்கு வந்துள்ளது. தென்னிந்திய நடிகர் சங்கம் இதில் தலையிட்டு, தீர்வு கண்டதாகவும், அவருடைய ஹார்ட் டிஸ்கை மீட்டு சோனாவிடம் ஒப்படைத்ததாகவும் தகவல்கள் தெரிவிக்கின்றன.

இதனைத் தொடர்ந்து, நடிகை சோனா தென்னிந்திய நடிகர் சங்கத்துக்கு நன்றி தெரிவித்திருக்கிறார். "யாரும் உதவி செய்ய முன்வராத நிலையில், நடிகர் சங்கம் தலையிட்டு என் பிரச்சனையை தீர்த்துவைத்தது மிகவும் நன்றிக்குரிய விஷயம்," என்று அவர் தெரிவித்தார்.

இதனை அடுத்து, ஸ்மோக் வெப் தொடர் விரைவில் ஓடிடி தளங்களில் வெளியாகும் என்று எதிர்பார்க்கப்படுகிறது. ஒரு ஆண்டுக்கு மேலாக இழுத்துக்கொண்டு இருந்த சோனாவின் ஹார்ட் டிஸ்க் பிரச்சனை, ஒரே ஒரு நாள் போராட்டத்தின் மூலம் முடிவுக்கு வந்துள்ளது என்பது குறிப்பிடத்தக்கது.