அதிமுக ஐடி பிரிவு இணைச்செயலாளர் திடீரென விஜய்யின் தமிழக வெற்றிக்கழகத்தின் அலுவலகத்திற்கு வருகை தந்துள்ளதை அடுத்து அவர் அந்த கட்சியில் இணைய போகிறார் என்று கூறப்படுகிறது.

கடந்த ஆண்டு பிப்ரவரி மாதம் தமிழக வெற்றி கழகம் என்ற அரசியல் கட்சியை விஜய் தொடங்கிய நிலையில் அந்த கட்சியில் மாற்று கட்சியின் பிரமுகர்கள் சிலர் இணையவிருப்பதாக கூறப்படுகிறது.

குறிப்பாக விடுதலை சிறுத்தைகள் கட்சியில் இருந்து விலகி வந்த ஆதவ் அர்ஜுனா விஜய்யின் தமிழக வெற்றி கழகத்தில் இணைய போவதாகவும் அவருக்கு மாநில அளவில் ஒரு பொறுப்பு அளிக்கப்பட இருப்பதாகவும் கூறப்படுகிறது. இது குறித்து அறிவிப்பு இன்று வெளியாகும் என்று எதிர்பார்க்கப்படுகிறது.

இந்த நிலையில் அதிமுக ஐடி பிரிவு இணைச் செயலாளராக உள்ள நிர்மல் குமார் என்பவர் பனையூரில் உள்ள தமிழக வெற்றி கழகத்தின் அலுவலகத்திற்கு வருகை தந்திருப்பதாகவும் விஜய் முன்னிலையில் அவர் அந்த கட்சியில் இணைய இருப்பதாகவும் தகவல் வெளியாகியுள்ளன.

ஏற்கனவே நிர்மல் குமார் பாஜகவில் இருந்த நிலையில் சில ஆண்டுகளுக்கு முன்பு தான் அவர் அந்த கட்சியில் இருந்து விலகி அதிமுகவில் இணைந்திருந்தார். இந்த நிலையில் தற்போது அதிமுகவிலிருந்து விலகி தமிழக வெற்றி கழகத்தில் இணைய இருப்பது பரபரப்பை ஏற்படுத்தி உள்ளது. அதுமட்டுமின்றி மேலும் சில பிற கட்சியில் உள்ள பிரமுகர்களும் தமிழக வெற்றி கழகத்தில் இணைய இருப்பதாக கூறப்படுகிறது.