பிரபல பாலிவுட் நடிகர் அமீர்கான் ஏற்கனவே இரண்டு பெண்களை திருமணம் செய்து, இருவரையும் விவாகரத்து செய்த நிலையில், இன்று தனது 60வது பிறந்த நாளை கொண்டாடி வருகிறார். இந்த சந்தர்ப்பத்தில், அவர் தனது புதிய காதலியை அறிமுகப்படுத்தியுள்ளார்.

நடிகர் அமீர்கான், 1986ஆம் ஆண்டு ரீனா என்பவரை திருமணம் செய்தார். இந்த தம்பதிக்கு இரண்டு குழந்தைகள் உள்ளனர். அதன் பிறகு, 2005ஆம் ஆண்டு கிரண் ராவ் என்பவரை திருமணம் செய்து கொண்டார். ஆனால், 2021ஆம் ஆண்டு இருவரும் பிரிவதாக அறிவித்தனர்.

இந்த நிலையில், இன்று தனது 60வது பிறந்த நாளை கொண்டாடும் அமீர்கான், தனது காதலியை அறிமுகம் செய்வதாக கூறியுள்ளார். இனிமேல் மறைக்க வேண்டிய அவசியம் இல்லை என்றும், பெங்களூரைச் சேர்ந்தவர் கௌரி தான் தனது புதிய காதலி என்றும் தெரிவித்துள்ளார்.

"25 ஆண்டுகளாக அவர் என்னை அறிவார். கடந்த சில ஆண்டுகளாக நாங்கள் ஒன்றாகவே வாழ்ந்து வருகிறோம்," என்று தெரிவித்துள்ளார். "மும்பையில் நடந்த ஒரு சந்திப்பிற்கு பிறகு, நாங்கள் தொடர்பில் இருந்தோம். அதன் பிறகு எல்லாமே இயற்கையாக நடந்தது," என்றும் அமீர்கான் கூறியுள்ளார்.

அதே நேரத்தில், "என்னுடைய முன்னாள் மனைவிகளான ரீனா மற்றும் கிரணுடன் நல்ல உறவில் உள்ளேன். குழந்தைகளை அன்புடன் கவனித்துக் கொள்கிறேன்," என்றும் கூறினார்.

ஆனால், "60 வயதில் திருமணம் செய்வது சரியா என தெரியவில்லை," என்றும் அமீர்கான் தெரிவித்துள்ளார்.