అభిమానులారా.. నా ఇంటికి రాకండి : బిగ్‌బీ
- IndiaGlitz, [Sunday,March 15 2020]
కరోనా వైరస్ పేరు వింటేనే ప్రపంచం వణికిపోతోంది.. చైనాలోని వూహాన్‌లో వచ్చిన ఈ వైరస్ ఖండాలను దాటేసి ప్రపంచ వ్యాప్తంగా విస్తరిస్తోంది. తెలంగాణలో సైతం వచ్చేసింది. మరోవైపు ఢిల్లీలో కూడా ఈ వైరస్ ఒకరిద్దరికి సోకినట్లు వైద్యులు నిర్దారణకు వచ్చారు. ఇలాంటి వార్తలు విన్న జనాలు గజ గజ వణికిపోతున్నారు. అయితే ఈ క్రమంలో సినిమా రిలీజ్‌లు, షూటింగ్‌లు, ఫంక్షన్స్‌ను నటీనటులు వాయిదా వేసుకుంటున్నారు. ఇప్పటికే మెగాస్టార్ చిరంజీవి తన సినిమా షూటింగ్‌ను వాయిదా వేస్తున్నానని.. ప్రతి ఒక్కరూ తగు జాగ్రత్తలు తీసుకోవాలని ఈ సందర్భంగా ఓ ప్రకటన విడుదల చేశారు.
జాగ్రత్తగా ఉండండి..
అయితే.. తాజాగా బాలీవుడ్‌ బిగ్‌ బీ అమితాబ్ బచ్చన్ కీలక ప్రకటన చేశారు. అభిమానుల కోసం అమితాబ్ ఈ నిర్ణయం తీసుకున్నారు. ప్రతి ఆదివారం తన ఇంటికి వచ్చే అభిమానులతో ముచ్చటించడం.. ఆప్యాయంగా పలకరించడం ఆయనకు ఆది నుంచి అలవాటే. అయితే కరోనా నేపథ్యంలో అభిమానులందరూ జాగ్రత్తగా ఉండాలని కోరిన ఆయన.. తనను కలవాడానికి కూడా రావొద్దని సూచించారు.
అర్థం చేస్కోండి..!
‘నన్ను కలిసేందుకు జల్సా గేట్ వద్దకు అభిమానులు ఎవరూ రావొద్దు. నేను అక్కడికి రావట్లేదు. ఈ విషయాన్ని నా అభిమానులు, శ్రేయోభిలాషులు అర్థం చేసుకోవాలి. మీరంతా తగు జాగ్రత్తలు తీసుకుని.. అప్రమత్తంగా ఉండాలి’ అని ట్విట్టర్ వేదికగా అమితాబ్ తెలిపారు.