అనుష్క శెట్టి .. ఈమె గురించి కొత్తగా చెప్పాల్సిన అవసరం లేదు. అందం, అభినయంతో ఆకట్టుకున్న ఈ భామ సౌతిండియా మహిళా సూపర్‌స్టార్‌‌గా, అత్యధిక రెమ్యూనరేషన్ తీసుకునే హీరోయిన్‌లలో ఒకరిగా అనుష్క వెలుగొందుతున్నారు. పూరి జగన్నాధ్ దర్శకత్వంలో తెరకెక్కిన సూపర్ సినిమాతో వెండితెరకు పరిచయమై అనతి కాలంలోనే దక్షిణాదిలో టాప్ హీరోయిన్ హోదా సంపాదించారు. కాగా అనుష్క ఇవాళ తన 40వ పుట్టినరోజును జరుపుకుంటున్నారు. దీంతో అభిమానులు, సినీ ప్రముఖులు ఆమెకు సోషల్ మీడియా ద్వారా పుట్టినరోజు శుభాకాంక్షలు తెలుపుతున్నారు.

అయితే నిశ్శబ్దం తర్వాత మరో సినిమాకు అనుష్క ఓకే చెప్పలేదు. దీంతో ఆమె త్వరలో పెళ్లి పీటలెక్కనుందని.. సినిమాలకు దూరం కానుందని ఇలా రకరకాలుగా కథనాలు వచ్చాయి. ఈ నేపథ్యంలో ఈ రూమర్‌లకి చెక్ పెట్టారు జేజేమ్మ. తన తదుపరి ప్రాజెక్ట్‌ని అధికారికంగా ప్రకటించారు. పి. మహేశ్‌బాబు దర్శకత్వంలో యూవీ క్రియేషన్స్‌ బ్యానర్‌పై తన 48వ ప్రాజెక్ట్‌ చేయనున్నట్లు ప్రకటించారు. ఫుల్‌ టైమ్‌ ఎంటర్‌టైనర్‌గా ఈ సినిమా తెరకెక్కనున్నట్లు సమాచారం. మరోవైపు యూవీ క్రియేషన్స్ - అనుష్క కాంబినేషన్‌లో వస్తోన్న హ్యాట్రిక్‌ చిత్రమిది. ఆ బ్యానర్‌లో వచ్చిన ‘మిర్చి’, ‘భాగమతి’, అనుష్కకు మంచి హిట్స్‌ అందించాయి. ఈ సినిమాకు సంబంధించిన పూర్తి వివరాలు తెలియాల్సి ఉంది.

మరోవైపు రజనీకాంత్, జ్యోతిక, నయనతార, ప్రభు ప్రధాన పాత్రల్లో పి వాసు దర్శకత్వంలో వచ్చిన బ్లాక్ బస్టర్ సినిమా 'చంద్రముఖి' సీక్వెల్‌లో అనుష్క నటించనుందని తెలుస్తోంది. దీనికి సంబంధించిన కథ విన్నా అనుష్క ఈ సినిమాను ఓకే చేసిందని అంటున్నారు. ఈ విషయంలో అధికారిక ప్రకటన వెలువడాల్సి ఉంది.