இயக்குனர் இமயம் பாரதிராஜாவின் மகன் மனோஜ் பாரதிராஜா திடீரென ஏற்பட்ட மாரடைப்பால் காலமானார் என்ற செய்தி திரையுலகில் பெரும் அதிர்ச்சியை ஏற்படுத்தியுள்ளது.

தமிழ்த் திரையுலகின் புரட்சி இயக்குனர் பாரதிராஜாவின் மகன் மனோஜ், கடந்த 1999ஆம் ஆண்டு ’தாஜ்மஹால்’ திரைப்படத்தின் மூலம் நடிகராக அறிமுகமானார். அதன் பிறகு அல்லி அர்ஜுனா, வருஷமெல்லாம் வசந்தம் உள்ளிட்ட பல திரைப்படங்களில் நடித்துள்ளார். சமீபத்தில், 2022ஆம் ஆண்டு வெளியான ’விருமன்’ படத்திலும் நடித்தார். அதன் பின்னர் ’மார்கழி திங்கள்’ என்ற படத்தை இயக்கினார்.

கடந்த சில நாட்களாக உடல்நிலை குறைவதால் அவர் சிகிச்சை பெற்று வந்ததாகவும், இதய அறுவை சிகிச்சையும் செய்யப்பட்டதாகவும் கூறப்படுகிறது. உடல் நலம் தேறி அவர் வீட்டில் ஓய்வு எடுத்துக் கொண்டிருந்த நிலையில், இன்று திடீரென அவருக்கு மாரடைப்பு ஏற்பட்டது. இதனைத் தொடர்ந்து அருகிலுள்ள மருத்துவமனையில் அனுமதிக்கப்பட்டார். ஆனால் பரிசோதனை செய்த மருத்துவர்கள் அவர் உயிரிழந்துவிட்டதாக தெரிவித்தனர்.

அவருடைய மறைவுக்கு தமிழக முதல்வர் மு.க. ஸ்டாலின் இரங்கல் தெரிவித்துள்ளார். அவர் இரங்கல் செய்தியில் கூறியிருப்பதாவது:

நடிகரும் இயக்குநர் பாரதிராஜா அவர்களின் மகனுமான திரு. மனோஜ் பாரதி அவர்கள் மறைந்த செய்தி அறிந்து மிகவும் வருத்தமுற்றேன்.

தனது தந்தையின் இயக்கத்தில் தாஜ்மகால் திரைப்படம் மூலம் அறிமுகமாகி, சமுத்திரம், அல்லி அர்ஜுனா, வருஷமெல்லாம் வசந்தம் எனத் தொடர்ந்து பல திரைப்படங்களில் நடித்து தனக்கென அடையாளத்தை உருவாக்கிக் கொண்டவர் திரு. மனோஜ் அவர்கள். இயக்கம் உள்ளிட்ட துறைகளிலும் முயன்று பார்த்தவர் மனோஜ்.

இளம் வயதில் அவர் எதிர்பாராதவிதமாக மறைந்துவிட்டது மிகுந்த அதிர்ச்சியளிக்கிறது. அன்பு மகனை இழந்து வாடும் இயக்குநர் இமயம் பாரதிராஜா அவர்களுக்கும், அவரது குடும்பத்தினருக்கும், திரைத்துறையைச் சேர்ந்த நண்பர்களுக்கும் எனது ஆழ்ந்த இரங்கலையும் ஆறுதலையும் தெரிவித்துக் கொள்கிறேன்.