చిత్ర పరిశ్రమలో విషాదం చోటు చేసుకుంది. హిందీ నటుడు అఖిల్ మిశ్రా ప్రమాదవశాత్తూ కన్నుమూశారు. హైదరాబాద్‌లో జరుగుతున్న షూటింగ్‌లో ప్రమాదవశాత్తూ బిల్డింగ్‌పై నుంచి అఖిల్ మిశ్రా కిందపడ్డారు. ఈ ఘటనలో తీవ్ర గాయాలపాలైన ఆయన తుదిశ్వాస విడిచినట్లు మిశ్రా సన్నిహితుడు ఖుల్వీందర్ భక్తి తెలిపారు. బాలీవుడ్ సూపర్‌స్టార్ ఆమీర్‌ఖాన్ నటించిన త్రీ ఇడియట్స్ సినిమాలో లైబ్రేరియన్ పాత్రలో అఖిల్ అద్భుతంగా నటించారు. ఆ తర్వాత డాన్, గాంధీ, మై ఫాదర్, శిఖర్ సహా పలు సినిమాల్లో మంచి పాత్రలు పోషించారు. సినిమాలతో పాటు సీఐడీ, ఉత్తరన్, ఉదాన్ వంటి టీవీ సీరియల్స్‌లోనూ అఖిల్ నటించారు.

జర్మన్ నటి సుజానే బెర్నార్డ్‌ను ప్రేమించి పెళ్లాడారు అఖిల్ మిశ్రా. 2009లో రిజిస్టర్ మ్యారేజ్ చేసుకున్న ఈ జంట అనంతరం 2011లో భారతీయ సాంప్రదాయ పద్దతిలో రెండోసారి పెళ్లి పీటలెక్కారు. ఆయన మరణంతో బాలీవుడ్‌లో విషాదం నెలకొంది. పలువురు సినీ ప్రముఖులు అఖిల్ మిశ్రా మృతి పట్ల సంతాపం తెలియజేస్తున్నారు. అయితే ఇంతకీ అఖిల్ హైదరాబాద్‌లో ఏ సినిమా షూటింగ్‌లో పాల్గొన్నాడన్నది మాత్రం తెలియరాలేదు.