బోయపాటి స్టైల్ మారిందా..
- IndiaGlitz, [Wednesday,July 12 2017]
యాక్షన్ సినిమాలు చేయ‌డంలో దిట్ట బోయపాటి శ్రీను. అందుకే బోయపాటి శ్రీను సినిమా అనగానే సగటు ప్రేక్షకుడికి గుర్తొచ్చేది యాక్షన్ సీన్స్‌, ఎమోషనల్‌ డైలాగ్స్‌. బాలకృష్ణ, ఎన్టీఆర్‌, వెంకటేష్‌, రవితేజ వంటి హీరోలతో పవర్‌ఫుల్‌ యాక్షన్ మూవీస్‌ చేసిన బోయపాటి తాజాగా బెల్లంకొండ శ్రీనివాస్‌ హీరోగా 'జయ జానకి నాయక' చిత్రం చేస్తున్న విషయం తెలిసిందే. ఈ చిత్రానికి సంబంధించిన టీజర్ ఈరోజు విడుదలైంది. ఈ టీజర్‌తో అందర్నీ ఆశ్చర్యపరిచాడు బోయపాటి.
రెగ్యులర్‌గా అతని సినిమాల్లో వుండే యాక్షన్ సీన్‌గానీ, కనీసం ఒక్క ఎమోషనల్‌ డైలాగ్‌గానీ లేదు. కేవలం హీరో, హీరోయిన్ మధ్య జరిగే సన్నివేశాలతోనే టీజర్ నిండిపోయింది. 'జయజానకి నాయక' చిత్రం ద్వారా బోయపాటి ప్రేక్షకులకు ఏం చూపించదలుచుకున్నాడో ఎవ్వరికీ అర్థం కావడంలేదు. అలా అర్థం కాకూడదనే అతని మార్క్‌ యాక్షన్, ఎమోషనల్‌ సీన్స్‌ని దాచి హీరో, హీరోయిన్ మధ్య సీన్స్‌నే చూపించారా అనేది అందరి సందేహం. రెగ్యులర్‌గా కాకుండా భిన్నంగా టీజర్‌ని రిలీజ్‌ చేసిన బోయపాటి సినిమాలో ఏం చూపించబోతున్నాడో తెలుసుకోవాలంటే ఆగస్ట్‌ 11 వరకు ఆగాల్సిందే.