தீ விபத்தில் சிக்கிய 250 கிலோ நகைகளை மீட்பது எப்படி? போலீசார் ஆலோசனை
- IndiaGlitz, [Thursday,June 01 2017]
சென்னை தி.நகரில் உள்ள சென்னை சில்க்ஸ் கட்டிடம் இரண்டாவது நாளாக கொழுந்துவிட்டு எரிந்து வருகிறது. கட்டிடத்தின் பெரும்பகுதி இடிந்து விழுந்துவிட்டபோதிலும் தீயை இன்னும் முற்றிலும் அணைக்க முடியவில்லை. தொடர்ந்து தீயணைப்பு வீரர்கள் கடுமையாக போராடி வருகின்றனர்.
இந்த நிலையில் சென்னை சில்க்ஸ் ஜவுளிக்கடையின் ஒரு அங்கமாக ஸ்ரீகுமரன் தங்கமாளிகையும் உள்ளது. இந்த நகைக்கடையில் உள்ள தங்கம் என்ன ஆகியிருக்கும் என்பது குறித்த செய்தியை நேற்று பார்த்தோம்
நாம் நேற்றே கூறியபடி குமரன் நகைக்கடையின் கீழ்த்தளத்தில் உள்ள லாக்கரில் சுமார் 250 கிலோ நகைகள் வைக்கப்பட்டுள்ளதாக தகவல் வெளியாகியுள்ளது. இந்த லாக்கர் சுமார் 1000 டிகிரி வெப்பத்தையும் தாங்கும் சக்தி படைத்தது என்பதால் இதில் இருக்கும் நகைகளுக்கும் தங்கக்கட்டிகளுக்கும் எந்தவித பாதிப்பும் ஏற்பட்டிருக்காது என்றும், கட்டிடத்தை இடிக்கும் முன்னர் அந்த லாக்கரை தீயணைப்பு படையினர்களும், போலீசார்களும் பத்திரமாக மீட்டு தர வேண்டும் என்றும் கடை உரிமையாளர் தரப்பில் கோரிக்கை வைக்கப்பட்டுள்ளதாக செய்திகள் வெளிவந்துள்ளது.
எனவே கடை உரிமையாளரின் கோரிக்கையை ஏற்று தீயணைக்கும் பணி முடிந்த பின்னர் நகைகள் அடங்கிய லாக்கரை மீட்பது எப்படி என்பது குறித்து போலீசார் ஆலோசனை செய்து வருவதாக கூறப்படுகிறது.