మెగాస్టార్ చిరంజీవి, సక్సెస్‌‌ఫుల్ చిత్రాల దర్శకుడు కొరటాల శివ కాంబోలో ‘ఆచార్య’ సినిమా తెరకెక్కుతున్న విషయం తెలిసిందే. ఈ చిత్రంలో చిరుకి జంటగా స్టార్ హీరోయిన్ కాజల్ నటిస్తుండగా.. మరో కీలక పాత్రలో మెగా పవర్ స్టార్ రామ్ చరణ్ నటిస్తున్నాడు. ఈ చిత్రంలో చెర్రీ సరసన పూజా హెగ్డే హీరోయిన్‌గా నటిస్తోంది. నక్సలైట్ నాయకుడిగా చెర్రీ ఈ చిత్రంలో నటిస్తున్నాడు. తండ్రీ కొడుకులు కలిసి నటిస్తున్న సినిమా కావడం.. కొరటాల దర్శకుడు కావడంతో సినిమాలు అంచనాలు ఓ రేంజ్‌లో ఉన్నాయి. ఈ సినిమాను నిరంజన్‌రెడ్డి, రామ్‌ చరణ్ సంయుక్తంగా నిర్మిస్తున్నారు.

ప్రస్తుతం ఈ సినిమా ఖమ్మం జిల్లా ఇల్లందులోని జేకే మైన్స్‌లో షూటింగ్ జరుగుతోంది. మంచి యాక్షన్ సన్నివేశాల కోసం కొరటాల ఈ ప్లేస్‌ను ఎంచుకున్నారు. కాగా.. ఈ నెల 15 వరకు జరగవలసిన ఆచార్య సినిమా షూటింగ్ వాయిదా పడింది.
అయితే తొలుత బొగ్గుగనిలో పెరిగిన ఉష్ణోగ్రతల కారణంగా చిరు డీహైడ్రేషన్‌కు గురయ్యారని.. కాబట్టి వారం రోజుల్లో జరగాల్సిన షూటింగ్‌కు కేవలం మూడు రోజుల్లోనే ముగింపు పలికారని టాక్ వచ్చింది. తిరిగి ఇక్కడ షూటింగ్ నిర్వహిస్తారా? లేదా? అనేది కూడా సందేహంగా మారింది. వీటన్నింటిపై తాజాగా ఓ క్లారిటీ వచ్చింది.

‘ఆచార్య’ సినిమా షూటింగ్ తిరిగి ఈ నెల 12వ తారీఖున ఇల్లందు సింగరేణి అండర్ గ్రౌండ్ మైన్స్‌లో ప్రారంభం కానుందని సమాచారం. ఈ సినిమాలో ప్రతినాయకుడి పాత్రలో సోన్‌సూద్ నటిస్తున్నారు. అయితే ఇల్లందు జేకే మైన్స్‌లో చిరు, సోనూసూద్‌ మధ్య జరిగే ఫైటింగ్ సన్నివేశాలను చిత్రీకరించాల్సి ఉంది. అయితే మంగళవారం సడెన్‌గా ఇల్లందు నుంచి సినిమా యూనిట్ వెళ్లిపోయింది. మూడు రోజుల పాటు రామ్ చరణ్ చిరంజీవిల సన్నివేశాలు చిత్రీకరణ పూర్తి చేశారు. 10, 11 తేదీలలో హీరో సోనూసూద్‌తో ఫైటింగ్ సన్నివేశం చిత్రీకరించాల్సి ఉండగా ఆయన వేరే షూటింగ్‌లో ఉండటం వలన ఆచార్య సినిమా షూటింగ్‌ను వాయిదా వేశారు.