பிரபல காமெடி நடிகை பிந்துகோஷ் கடந்த சில மாதங்களாக உடல் நலக்குறைவு காரணமாக சிகிச்சை பெற்று வந்த நிலையில், தற்போது சிகிச்சை பலனின்றி காலமானதாக வெளிவந்த செய்தி திரையுலகினர்களுக்கு பெரும் அதிர்ச்சியை ஏற்படுத்தியுள்ளது.

தமிழ் உள்பட பல தென்னிந்திய மொழிகளில் நடித்த நடிகை பிந்துகோஷ். பிரபு நடித்த "கோழி கூவுது" என்ற திரைப்படத்தின் மூலம் நடிகையாக அறிமுகமானார். அதன் பிறகு "உருவங்கள் மாறலாம்," "டௌரி கல்யாணி," "சூரக்கோட்டை சிங்கக்குட்டி," "தூங்காதே தம்பி தூங்காதே," "கொம்பேறி மோகன்," "நீதியின் நிழல்," "விடுதலை" உட்பட பல திரைப்படங்களில் நடித்துள்ளார்.

குறிப்பாக, விஜயகாந்த் நடித்த "வெள்ளை புறா ஒன்று" என்ற திரைப்படத்தில் காமெடி நடிகர் லூஸ் மோகனுடன் ஜோடியாக நடித்திருப்பார். இருவரும் இணைந்து "பொண்ணுன்னா பொண்ணு எம்மாம் பெரிய பொண்ணு" என்ற பாடலுக்கு நடனம் ஆடியது ரசிகர்களை கவர்ந்தது என்பது குறிப்பிடத்தக்கது.

இந்த நிலையில், கடந்த சில மாதங்களாக உடல் நலக்குறைவு காரணமாக சிகிச்சை பெற்று வந்த 76 வயது பிந்து போஸ், சிகிச்சை பலனின்றி காலமானார் என்று அவரது மகன்கள் தெரிவித்துள்ளனர். இதையடுத்து, அவருக்கு ரசிகர்கள் மற்றும் திரையுலகினர் அஞ்சலி செலுத்தி வருகின்றனர்.