பிறந்த 30 மணி நேரத்தில் குழந்தையை தாக்கிய கொரோனா: சீனாவில் பரபரப்பு
- IndiaGlitz, [Wednesday,February 05 2020]
சீனாவில் கடந்த சில நாட்களாக கொரோனாவைரஸ் பயங்கரமாக பரவி வரும் நிலையில் இந்த வைரஸால் பலியானோர் எண்ணிக்கை 500ஐ நெருங்கிவிட்டதாக அதிர்ச்சி தகவல் ஒன்று வெளிவந்துள்ளது. இந்த நிலையில் கொரோனாவைரஸ் தாக்குதலுக்கு பிறந்து 30 மணி நேரமே ஆன குழந்தை ஒன்றும் பாதிக்கப்பட்டுள்ளதாக வெளிவந்துள்ள செய்தி பெரும் அதிர்ச்சியை ஏற்படுத்தியுள்ளது.
கொரோனா வைரஸ் தலைவிரித்தாடும் சீனாவில் வுகான் என்ற பகுதியில் சமீபத்தில் பிறந்த குழந்தை ஒன்றுக்கு கொரோனாவைரஸ் இருக்கிறதா? என்று சோதனை செய்யப்பட்டது. அந்த குழந்தை பிறந்து முப்பது மணி நேரமே ஆன நிலையில் அந்த குழந்தைக்கு கொரோனா வைரஸ் தொற்று இருப்பதை மருத்துவர்கள் கண்டுபிடித்துள்ளனர் தாயிடமிருந்து குழந்தைக்கு இந்த கொரோனா வைரஸ் பரவி இருக்கலாம் என்று கூறப்படுகிறது.
கர்ப்ப காலத்திலிருந்தே தாயிடமிருந்து குழந்தைக்கு கொரோனா வைரஸ் தொற்று நோய் பரவி இருப்பதாகவும் தற்போது அந்த தாய்க்கும் குழந்தைக்கும் கொரோனா வைரஸ் குறித்த சிகிச்சை அளிக்கப்பட்டு வருவதாகவும் மருத்துவர்கள் தெரிவித்துள்ளனர். பிறந்த 30 மணி நேரமே ஆன குழந்தைக்கும் கொரோனா வைரஸ் தாக்குதல் இருப்பது குறித்த செய்தி பெரும் பரபரப்பை ஏற்படுத்தியுள்ளது.