சூர்யாவுடன் முதல்முறையாக இணையும் பிரபலம்
- IndiaGlitz, [Monday,December 23 2019]
நடிகர் சூர்யா நடித்து முடித்துள்ள 38வது திரைப்படமான ’சூரரைப்போற்’று என்ற திரைப்படத்தின் படப்பிடிப்பு சமீபத்தில் முடிந்து தற்போது போஸ்ட் புரொடக்ஷன் பணிகள் விறுவிறுப்பாக நடைபெற்று வருகிறது. இந்நிலையில் சூர்யாவின் 40வது படத்தை வெற்றிமாறன் இயக்க இருப்பதாகவும் கலைப்புலி எஸ் தாணு அவர்கள் தயாரிக்க இருப்பதாகவும் அதிகாரபூர்வமான செய்தி சமீபத்தில் வெளிவந்தது என்பதை பார்த்தோம்.
இந்நிலையில் சூர்யாவின் 39வது படத்தை இயக்குனர் ஹரி இயக்கும் உள்ளதாக கூறப்படுகிறது. இந்த படத்தின் ஆரம்பகட்ட பணிகள் நடைபெற்று வருவதாகவும் இந்த படத்தில் பணிபுரியும் உள்ள நட்சத்திரங்கள் மற்றும் தொழில்நுட்ப கலைஞர்களின் தேர்வு நடைபெற்று வருவதாகவும் கூறப்படுகிறது.
இந்த நிலையில் இந்த படத்திற்கு டி இமான் இசை அமைப்பார் என தெரிகிறது. ஏற்கனவே ரஜினியின் ‘தலைவர் 168’ உள்பட முன்னணி நடிகர்களின் படங்களுக்கு டி.இமான் இசையமைத்து வரும் நிலையில் தற்போது முதல்முறையாக சூர்யாவுடன் அவர் இணைந்துள்ளார்.
சூர்யா மற்றும் ஹரி கூட்டணியில் உருவான திரைப்படங்களில் தேவிஸ்ரீபிரசாத், ஹாரிஸ் ஜெயராஜ், யுவன் சங்கர் ராஜா ஆகியோர்களே இதுவரை இசையமைத்துள்ளனர் என்பது குறிப்பிடத்தக்கது.