தனுஷ் இயக்கத்தில் உருவான ’நிலவுக்கு என் மேல் என்னடி கோபம்’ என்ற திரைப்படம் வரும் 21ஆம் தேதி திரையரங்குகளில் வெளியாக இருக்கும் நிலையில் இந்த படத்தின் டிரைலர் சற்றுமுன் வெளியாகி இணையத்தில் வைரல் ஆகி வருகிறது.

டிரைலரின் ஆரம்பத்திலேயே ’இது ஒரு யூசுவலான ஸ்டோரி தான்’ என்று தனுஷ் வசனம் பேசுகிறார். இது ஒரு பையன், இது ஒரு பொண்ணு, இந்த பையனும், இந்த பொண்ணும் லவ் பண்றாங்க, அப்ப இந்த பையன் யாரு? என்ற கேள்வியுடன் டிரைலர் தொடங்குகிறது.

அதே கேள்வியை பிரியங்கா மோகன், ‘ இது ஒரு பையன், இது ஒரு பொண்ணு, இந்த பையனும் இந்த பொண்ணும் கல்யாணம் பண்ணிக்க போறாங்க, இப்ப இந்த பொண்ணு யாரு? என்ற கேள்விக்கு ஹீரோ ‘என் எக்ஸ் கேர்ள் பிரண்ட்’ என்று ஹீரோ பதில் கூறும் காட்சியில் இருந்து படத்தின் கதையை ஓரளவு புரிந்து கொள்ள முடிகிறது.

இந்த படத்தின் ஹீரோ முன்னாள் காதலிக்கும் தற்போது காதலித்துக் கொண்டிருக்கும் பெண்ணுக்கும் இடையில் மாட்டிக்கொண்டு திணறும் காட்சிகள் தான் நகைச்சுவையுடன் எடுக்கப்பட்டுள்ளது என்பது தெரியவந்துள்ளது.

தனுஷின் உறவினர் பவிஷ் ஹீரோவாக நடித்திருக்கும் இந்த படத்தில் அனிகா சுரேந்திரன், பிரியா பிரகாஷ் வாரியர், மாத்யூஸ், வெங்கடேஷ் மேனன், ரம்யா ரங்கநாதன் உள்ளிட்ட பலர் நடித்துள்ளனர். ஜி வி பிரகாஷ் இசையில் ஜிகே பிரசன்னா படத்தொகுப்பில் லியோன் பிரிட்டோ ஒளிப்பதிவில் உருவாகி இருக்கும் இந்த படத்தை வொண்டர்பார் பிலிம்ஸ் பிரைவேட் லிமிடெட் நிறுவனம் தயாரித்துள்ளது.

’நிலவுக்கு என் மேல் என்னடி கோபம்’ என்ற தனுஷின் இயக்கத்தில் உருவாகி உள்ள நிலையில் இந்த படம் மிகப்பெரிய எதிர்பார்ப்பை ஏற்படுத்தி உள்ளது என்பது குறிப்பிடத்தக்கது.