நடிகர் விஜய், தமிழக வெற்றிக்கழகம் என்ற கட்சியை தொடங்கி ஒரு ஆண்டு முடிவடைந்து, இரண்டாம் ஆண்டில் காலடி எடுத்து வைத்திருக்கும் நிலையில், இது குறித்த நிகழ்ச்சி ஒன்றில் இயக்குனர் வெற்றிமாறன் கலந்து கொண்டதை அடுத்து, அவர் கட்சியில் இணைகிறாரா? என்ற கேள்வி எழுந்துள்ளது.

நடிகர் விஜய் கடந்த ஆண்டு பிப்ரவரி 2ஆம் தேதி, தமிழக வெற்றிக்கழகம் என்ற அரசியல் கட்சியை தொடங்கிய நிலையில், இந்த கட்சி தொடங்கி நேற்றுடன் ஒரு ஆண்டு நிறைவு பெற்றுள்ளது. இதனை அடுத்து, தனது கட்சியின் கொள்கை தலைவர்களின் சிலைகளை திறந்த விஜய், அந்த சிலைகளுக்கு மாலை அணிவித்து மரியாதை செய்தார்.

இந்த நிலையில், தமிழக வெற்றிக்கழகம் இரண்டாவது ஆண்டில் காலடி எடுத்து வைத்துள்ளதை முன்னிட்டு, மதுரை மாவட்டம் அழகர் கோவில் அருகே இரட்டை மாட்டு வண்டி பந்தயம் நடைபெற்றது. இந்த பந்தயத்தை, தமிழக வெற்றிக்கழகத்தின் மதுரை மாவட்ட செயலாளர் விஜய் அன்பன் தலைமையில் நடத்தப்பட்டது.

இந்த போட்டியில், இயக்குனர் வெற்றிமாறன் சிறப்பு விருந்தினராக கலந்து கொண்டார். அவர் வருகை தந்த போது, தமிழக வெற்றிக்கழகத்தின் தொண்டர்கள் அவருக்கு மாலை அணிவித்து உற்சாகமாக வரவேற்றனர். இந்த நிகழ்ச்சி முடியும் வரை, அவர் கலந்து கொண்டதாக தெரிகிறது.

விஜய்யின் தமிழக வெற்றிக்கழகத்தின் விழாவில் இயக்குனர் வெற்றிமாறன் கலந்து கொண்டதை வைத்து, அவர் கட்சியில் இணைவாரா என்ற கேள்வி எழுந்துள்ளது. இருப்பினும், இது குறித்து வெற்றிமாறன் அறிவித்தால் மட்டுமே உறுதி செய்யப்படும் என்பதும் குறிப்பிடத்தக்கது.