தமிழக முதல்வருடன் முக ஸ்டாலின் திடீர் சந்திப்பு!
- IndiaGlitz, [Monday,October 19 2020]
தமிழக முதல்வர் எடப்பாடி பழனிச்சாமி அவர்களை இன்று திமுக தலைவர் முக ஸ்டாலின் சந்தித்தார்.
சமீபத்தில் முதல்வர் பழனிசாமி அவர்களின் தாயார் மறைந்ததை அடுத்து திமுக தலைவர் முக ஸ்டாலின் உள்பட அரசியல் கட்சி தலைவர்கள் இரங்கல் தெரிவித்தனர் என்பதை ஏற்கனவே பார்த்தோம்
இந்த நிலையில் முதல்வரின் தாயாரின் மறைவுக்கு நேரில் ஆறுதல் தெரிவிப்பதற்காக திமுக தலைவர் முக ஸ்டாலின் அவர்கள் சற்றுமுன் முதல்வர் எடப்பாடி பழனிசாமி அவர்களை அவரது இல்லத்தில் சந்தித்தார். சென்னை கிரீன்வேஸ் சாலையில் உள்ள முதல்வரின் வீட்டில் வைக்கப்பட்டிருந்த முதல்வர் தாயார் உருவப்படத்திற்கு மலர்தூவி அஞ்சலி செலுத்தினார். இந்த சந்திப்பின்போது திமுக பொதுச்செயலாளர் துரைமுருகன் மற்றும் அமைச்சர்கள் சிலர் உடனிருந்தனர்.
சமீபத்தில் சைதாப்பேட்டை திமுக எம்.எல்.ஏ மா.சுப்பிரமணியன் மகன் கொரோனாவால் பலியானபோது முதல்வர், துணை முதல்வர் உள்பட அதிமுகவினர் இரங்கல் தெரிவித்ததும், முதல்வரின் தாயார் மறைவிற்கு திமுக தலைவர் நேரில் வந்து ஆறுதல் கூறியதும் தமிழகத்தின் அரசியல் நாகரீகத்தை எடுத்து காட்டும் நிகழ்வுகளாக பார்க்கப்படுகிறது