MLC Kavitha: బీఆర్ఎస్ ఎమ్మెల్సీ కవిత ఇంట్లో ఈడీ సోదాలు.. గులాబీ నేతల్లో టెన్షన్..
- IndiaGlitz, [Friday,March 15 2024]
లోక్‌సభ ఎన్నికల వేళ తెలంగాణ రాజకీయాల్లో కీలక పరిణామం చోటుచేసుకుంది. బీఆర్ఎస్ ఎమ్మెల్సీ కవిత ఇంట్లో ఐటీ, ఈడీ సోదాలు జరుగుతున్నాయి. ఢిల్లీ నుంచి వచ్చిన అధికారుల బృందం తనిఖీలు నిర్వహిస్తోంది. దీంతో కవిత ఇంటి ముందు భారీగా పోలీసులు మోహరించారు. ప్రస్తుతం ఆమె ఇల్లు కేంద్ర బలగాల ఆధీనంలో ఉంది. మరోవైపు బీఆర్ఎస్ కార్యకర్తలు, నేతలు ఆమె ఇంటికి భారీగా చేరుకుంటున్నారు. ఢిల్లీ లిక్కర్ స్కాంకు సంబంధించిన వ్యవహారంలో ఆమె బ్యాంకు ఖాతాలను పరిశీలిస్తున్నారు. ఆమె భర్త వ్యాపారాల గురించి కూడా ఆరా తీస్తున్నారు.
కవిత స్టేట్మెంట్ రికార్డు చేయడంతో పాటు ఆమె రెండు ఫోన్లను సీజ్ చేశారు. ఇంట్లోకి ఎవరిని అనుమతించడం లేదు. ఇందులో ఆ కేసుకు సంబంధించి ఒక్క ఆధారం దొరికినా ఆమెను అరెస్ట్ చేసే అవకాశాలున్నాయని తెలుస్తోంది. దీంతో ఏం జరగనుందనే ఆందోళన గులాబీ నేతల్లో కనిపిస్తోంది. ఈడీ అధికారుల సోదాలపై బీఆర్ఎస్ స్పందించింది. ఎన్నికల కోడ్ మరో 24 గంటల్లో వస్తుందనగా ఈ సోదాలు ఏంటని ఆ పార్టీ నేతలు స్పందిస్తున్నారు.
కాగా ఢిల్లీ లిక్కర్ కేసులో ఆమెను ఇటీవల సీబీఐ నిందితురాలిగా చేర్చిన సంగతి తెలిసిందే. పలుమార్లు విచారణకు హాజరుకావాలని సీబీఐతో పాటు ఈడీ అధికారులు కూడా నోటీసులు ఇచ్చారు. అయితే ఈడీ సమన్లను సవాల్ చేస్తూ సుప్రీంకోర్టులో కవిత వేసిన పిటిషన్‌పై విచారణ మరోసారి వాయిదా పడింది. ఈ నెల 19న విచారణ జరపనున్నట్లు జస్టిస్ బేలా ఎం త్రివేది, జస్టిస్ పంకజ్ మిట్టల్ ధర్మాసనం స్పష్టం చేసింది.
గతేడాది మార్చిలో కవితను మూడు సార్లు ఢిల్లీలో ఈడీ అధికారులు విచారించిన సంగతి తెలిసిందే. విచారణకు సహకరించిన కవిత.. అధికారులు అడిగిన అన్ని ప్రశ్నలకు సమాధానం ఇచ్చారు. ఆ సమయంలో ఆమె వినియోగించిన ఫోన్లు, ల్యాప్‌టాప్‌లు సైతం వారికి అప్పగించారు. అప్పుడు రోజుకు దాదాపు 10 గంటలకు పైగా కవితను విచారించారు. అంతసేపు విచారించడంతో ఆమె అరెస్ట్ ఖాయమని జోరుగా ప్రచారం జరిగింది. అయితే అప్పటినుంచి ఆమె విచారణ పెండింగ్‌లోనే ఉంది. ఇప్పుడు ఏకంగా ఆమె ఇంట్లోనే అధికారులు సోదాలు నిర్వహిస్తుండటం తీవ్ర చర్చనీయాంశమైంది.