சமந்தா முதல் முதலாக ஒரு திரைப்படத்தை தயாரிக்க இருப்பதாகவும், ஏற்கனவே சமந்தா நடித்த இரண்டு திரைப்படங்களை இயக்கிய பெண் இயக்குநர் தான் இந்த படத்தை இயக்க இருப்பதாகவும் தகவல் வெளியாகியுள்ளது.

தமிழ், தெலுங்கு திரையுலகில் முன்னணி நடிகையான சமந்தா, கடந்த சில ஆண்டுகளாக திரையுலகில் அதிகம் கவனம் செலுத்தாமல், உடல் நலனில் கவனம் செலுத்தி வருகிறார். இடையிடையே சில வெப் தொடர்களில் மட்டும் நடித்து வருகிறார் என்பதும் குறிப்பிடத்தக்கது.

இந்த நிலையில், நடிகை சமந்தா ஒரு திரைப்படத்தை தயாரிக்க இருப்பதாக தகவல் வெளிவந்துள்ளது. அவர் ஏற்கனவே "ட்ராலாலாம் மூவிஸ் பிக்சர்ஸ்" என்ற தயாரிப்பு நிறுவனத்தை வைத்திருக்கும் நிலையில், அந்த நிறுவனத்தின் மூலம் தான் தனது முதல் தயாரிப்பை தொடங்க இருப்பதாக கூறப்படுகிறது. இந்த படத்தில் சமந்தா நடிக்க இருப்பதாகவும் பெண் இயக்குனர் நந்தினி ரெட்டி இயக்க இருப்பதாகவும் செய்திகள் வெளியாகியுள்ளது.

சமீபத்தில் நடந்த சினிமா நிகழ்ச்சி ஒன்றில் பேசிய இயக்குனர் பி.வி. நந்தினி ரெட்டி, சமந்தாவின் அடுத்த படத்தை தான் இயக்க இருப்பதாக தெரிவித்துள்ளார். ஏற்கனவே, சமந்தா நடித்த "ஜபர்தஸ்த்" மற்றும் "ஓ பேபி" ஆகிய படங்களை இயக்கியுள்ளார். இந்த இரண்டு படங்களும் நல்ல வரவேற்பை பெற்ற நிலையில், தற்போது மூன்றாவது முறையாக சமந்தாவின் படத்தை இயக்க இருப்பதாக அறிவித்துள்ளார்.

இதனை அடுத்து, சமந்தா மற்றும் நந்தினி ரெட்டி மீண்டும் இணையும் இந்த படம், ரசிகர்கள் மத்தியில் நல்ல வரவேற்பு மற்றும் எதிர்பார்ப்பை ஏற்படுத்தியுள்ளது.