அஜித், த்ரிஷா நடிப்பில் ஆதிக் ரவிச்சந்திரன் இயக்கத்தில் உருவாகியுள்ள ’குட் பேட் அக்லி’ என்ற திரைப்படம் வரும் ஏப்ரல் 10ஆம் தேதி உலகம் முழுவதும் பிரமாண்டமாக வெளியாக இருக்கிறது. இந்த படத்தின் புரமோஷன் பணிகளும் விறுவிறுப்பாக நடைபெற்று வருகிறது.

அந்த வகையில், இயக்குனர் ஆதிக் ரவிச்சந்திரன் சமீபத்தில் அளித்த பேட்டியில் சில பிரத்யேகமான தகவல்களை வெளியிட்டுள்ளார். அந்த தகவல்கள் தற்போது ஆச்சரியத்தை ஏற்படுத்தியுள்ளது. அவர் கூறியதாவது: அஜித் அவர்களின் கேரக்டர் மாஸ் மற்றும் எமோஷனல் அம்சங்கள் சம அளவில் கலந்து இருக்கும் என்றும், தந்தை-மகன் பந்தம் குடும்ப ரசிகர்களை நன்றாக இணைத்து விடும் என்றும் அவர் தெரிவித்துள்ளார்.

“நாங்கள் வெறும் ஆக்சன் படமாக மட்டும் இல்லாமல், எமோஷனல் அம்சங்களையும் இந்த படத்தில் அதிகமாக வைத்துள்ளோம்,” என்றும் அவர் கூறியுள்ளார். அஜித்தின் ஜோடியாக நடித்துள்ள த்ரிஷா முக்கியத்துவமான கதாபாத்திரத்தில் நடித்துள்ளார். பிரபல தெலுங்கு நடிகர் கார்த்திகேயா, அஜித்தின் மகனாக நடித்துள்ளதாகவும் அவர் கூறியுள்ளார்.

அஜித் நடித்த ’வரலாறு’ திரைப்படத்தில், கார்த்திகேயா குழந்தை நட்சத்திரமாக நடித்திருந்தார். தற்போது அதே வரலாறு திரும்பும் வகையில், ’குட் பேட் அக்லி’ படத்தில் அவர் அஜித்தின் மகனாக நடித்துள்ளார் என்பது எதிர்பாராத பொருத்தமாக பார்க்கப்படுகிறது.

அதேபோல், பிரசன்னா மற்றும் அர்ஜுன் தாஸ் ஆகிய இருவரின் கதாபாத்திரங்களும் ஹைலைட்டாக இருக்கும் எனவும், இருவரும் அற்புதமான நடிப்பை வழங்கியுள்ளதாகவும் இயக்குனர் ஆதிக் தெரிவித்துள்ளார்.

படத்தின் கதையை பொருத்தவரை, “இந்த உலகம் நம்மை நல்லபடியாக பார்த்தால் நாமும் நல்லவராக இருக்கலாம். ஆனால், இந்த உலகம் நம்மை கெட்டவராக பார்த்தால், நாம் அதைவிட கெட்டவராக அதாவது அக்லியாக இருக்க வேண்டிய நிலை வரும்” என்பது இப்படத்தின் மையக்கரு என அவர் குறிப்பிட்டுள்ளார்.

"அஜித் சாரை நான் திரையில் எப்படி பார்க்க வேண்டும் என்று நினைத்திருந்தேனோ, அதைவிட அதிகமாக இந்த படத்தில் காட்டி உள்ளேன்," என்றும் இயக்குனர் ஆதிக் ரவிச்சந்திரன் தெரிவித்துள்ளார்.