பிரம்மாண்டமான அரங்கத்தில் ஜீவா படத்தின் படப்பிடிப்பு
- IndiaGlitz, [Monday,May 21 2018]
'கலகலப்பு 2' படத்தின் வெற்றியை அடுத்து கோலிவுட்டில் மீண்டும் தனது மார்க்கெட்டை நிலைநிறுத்தியுள்ள நடிகர் ஜீவா தற்போது 'கொரில்லா' மற்றும் 'கீ' ஆகிய படங்களில் நடித்து வருகிறார்
இதில் 'கொரில்லா' படத்தின் படப்பிடிப்பு இறுதிக்கட்டத்தை நெருங்கியுள்ளது. ஆல் இன் பிக்சர்ஸ் பட நிறுவனம் தயாரித்து வரும் ‘கொரில்லா ’படத்தில் ஜீவா, சதீஷ், மொட்டை ராஜேந்திரன், யோகி பாபு, ஷாலினி பாண்டே, ராதாரவி மற்றும் பலர் நடிக்கிறார்கள்.
இந்த படம் குறித்து தயாரிப்பாளர் விஜய் ராகவேந்திரா பேசும் போது, ‘இந்தியாவில் முதன்முதலாக சிம்பன்சி குரங்குடன் நடிகர்கள் இணைந்து நடிக்கும் இந்த கொரில்லா படத்தின் முதற்கட்ட படபிடிப்பு அண்மையில் தாய்லாந்து நாட்டில் நடைபெற்று முடிவடைந்தது.
இதன் இறுதி கட்ட படபிடிப்பிற்காக நூற்றுக்கணக்கான திரைப்பட தொழிலாளர்களின் உழைப்பில் சென்னையின் புறநகரில் பிரம்மாண்டமான அரங்கம் ஒன்று உருவாக்கப்பட்டது. அந்த அரங்கத்தில் கடும் கோடையையும் பொருட்படுத்தாமல் நடிகர்கள் ஜீவா, சதீஷ், மொட்டை ராஜேந்திரன், யோகி பாபு மற்றும் டத்தோ ராதாரவி ஆகியோருடன் ஆயிரம் துணை நடிகர் நடிகைகள் பங்குபெறும் காட்சிகள் படமாக்கப்பட்டு வருகின்றன. நடிகர் ராதாரவி அவர்களின் வழிகாட்டல் படக்குழுவினருக்கு பேருதவியாக அமைந்திருக்கிறது. இந்த படப்பிடிப்பு நடைபெற்று முடிந்தவுடன் ‘கொரில்லா ’ படத்திற்கான ஃபர்ஸ்ட் லுக் மற்றும் டீஸர் வெளியிடப்படும். ’ என்று கூறியுள்ளார்.