ஜிவி பிரகாஷின் 'ரிபெல்' சென்சார் தகவல்.. ரிலீஸ் எப்போது?
- IndiaGlitz, [Wednesday,January 24 2024]
ஜிவி பிரகாஷ் நடித்த ‘ரிபெல்’ என்ற படத்தின் படப்பிடிப்பு சமீபத்தில் முடிவடைந்த நிலையில் தற்போது இந்த படம் ரிலீசுக்கு தயாராக உள்ளது.
தமிழ் திரை உலகில் நடிகர் மற்றும் இசையமைப்பாளர் என இரட்டை குதிரைகளில் வெற்றிகரமாக சவாரி செய்பவர் ஜிவி பிரகாஷ். ஒரு பக்கம் இசையமைப்பில் பிசியாக இருந்தாலும் இன்னொரு பக்கம் ஹீரோவாக அவர் நடித்து முடித்த படங்கள் வெளியாகி வருகின்றன.
இந்த நிலையில் ஜிவி பிரகாஷ் ‘ரிபெல்’ என்ற படத்தில் நடித்து முடித்துள்ள நிலையில் இந்த படத்தின் சென்சார் தகவல் தற்போது வெளியாகியுள்ளது. இந்த படத்தை பார்த்த சென்சார் அதிகாரிகள் படத்திற்கு ’யுஏ’ சான்றிதழ் அளித்துள்ளனர். மூணாறு பகுதியில் உள்ள மக்களின் அரசியல் குறித்து பேசும் இந்த படம் இதுவரை வெளியே தெரியாத மூணாறு மக்களின் பல விஷயங்களை வெளிப்படுத்தும் என்று எதிர்பார்க்கப்படுகிறது.
இயக்குனர் நிகேஷ் இயக்கத்தில் ஸ்டுடியோ கிரீன் ஞானவேல் ராஜா தயாரிப்பில் உருவாகியுள்ள இந்த படத்தில் ஜிவி பிரகாஷ் ஜோடியாக மமிதா பஜிலு என்பவர் நடித்துள்ளார். மேலும் இந்த படத்தில் வெங்கடேஷ், ஷாலு ரஹிம், கருணாஸ், ஆதித்யா பாஸ்கர், கல்லூரி வினோத் உள்ளிட்டோர் நடித்துள்ளனர்.
ஜிவி பிரகாஷ் இசையில் உருவாகிய இந்த படத்தின் ரிலீஸ் தேதி நாளை காலை 10 மணிக்கு அதிகாரபூர்வமாக அறிவிக்கப்படும் என்பது குறிப்பிடத்தக்கது.