நடிகை அஞ்சலிக்கு பிறந்த நாள் வாழ்த்துக்கள்
- IndiaGlitz, [Friday,June 16 2017]
'நிஜமாத்தான் சொல்றியா' இந்த வசனத்தை எங்கே கேட்டாலும் உடனே 'கற்றது தமிழ்' படத்தில் அஞ்சலி பேசிய வசனம் தான் அனைவருக்கும் ஞாபகம் வரும். முதல் படத்திலேயே தனது நடிப்பு முத்திரையை பதித்து இன்று தமிழ், தெலுங்கு திரையுலகில் முன்னணி நாயகிகளில் ஒருவராக இருக்கும் நடிகை அஞ்சலிக்கு பிறந்த நாள் வாழ்த்துக்கள்.
'கற்றது தமிழ்' படத்தில் கிடைத்த மாபெரும் வரவேற்புக்கு பின்னர் அஞ்சலி நடித்த 'அங்காடி தெரு' படம் இன்னும் நம் கண்ணுக்குள்ளே இருக்கும் ஒரு படம். கனி என்ற கேரக்டரில் அவர் நடித்தார் என்று சொல்வதை விட வாழ்ந்தார் என்றே சொல்லலாம். குறிப்பாக கிளைமாக்ஸ் காட்சியில் தனக்கு கால் போய்விட்டது என்பதை அறிந்தவுடன் அவர் கதறி அழும் காட்சி கல்நெஞ்சோரை கூட கரைய செய்யும்.
இதன் பின்னர் 'தூங்கா நகரம்', மங்காத்தா, 'எங்கேயும் எப்போதும், கலகலப்பு, இறைவி போன்ற படங்கள் அஞ்சலியின் நடிப்பை வெளிப்படுத்திய குறிப்பிடத்தக்க படங்கள் ஆகும்.
கற்றது தமிழ் படத்திற்காக சிறந்த அறிமுக நடிகை மற்றும் அங்காடித்தெரு', 'எங்கேயும் எப்போதும்' ஆகிய படங்களுக்காக சிறந்த நடிகை பிலிம்பேர் விருதுகளும் நந்தி விருது உள்பட பல விருதுகளையும் அஞ்சலி பெற்றுள்ளார்.
தற்போது பலூன், தரமணி மற்றும் பேரன்பு போன்ற படங்களில் அஞ்சலி நடித்து வருகிறார். தென்னிந்திய திரையுலகில் அஞ்சலி இன்னும் பல படங்களில் நடித்து சாதனை செய்ய இந்த இனிய பிறந்த நாளில் நம்முடைய வாழ்த்துக்களை தெரிவித்து கொள்கிறோம்.