முன்றே படங்கள் மட்டுமே இயக்கி, அதில் ஒன்றில் தேசிய விருது பெற்று, முன்னணி இயக்குனர்கள் பட்டியலில் ஒருவர் இருக்கின்றார் என்றால் அவர் வெற்றிமாறன் மட்டுமே. பெயரில் மட்டுமின்றி அவரது படங்களும் வெற்றி வாகை சூடி வரும் நிலையில் அவர் இன்று தனது பிறந்த நாளை கொண்டாடி வருகிறார். அவருக்கு வெற்றி மேல் வெற்றி கிடைக்க IndiaGlitz-ன் இனிய பிறந்த நாள் வாழ்த்துக்கள்.

வெற்றிமாறனின் முதல் படம் தனுஷ் நடித்த 'பொல்லாதவன்'. முதல் படம் என்று நினைக்க முடியாத வகையில் இயக்கியிருந்த அந்த படம் மிகப்பெரிய வெற்றியை பெற்றது. மேலும் வெற்றிமாறனின் இரண்டாவது படமான 'ஆடுகளம்' படம் மிகப்பெரிய வெற்றி பெற்றது மட்டுமின்றி சிறந்த இயக்குனர் மற்றும் சிறந்த திரைக்கதைக்கான தேசிய விருது, சிறந்த நடிகருக்கான தேசிய விருது, பிலிம்பேர் விருது, சைமா விருது உள்பட பல விருதுகளை குவித்தது.

வெற்றி மாறனின் மூன்றாவது படமான 'விசாரணை' படம் வசூல் அளவில் வெற்றி பெற்றது மட்டுமின்றி சிறந்த தமிழ் படத்திற்கான தேசிய விருதும் பெற்றது. அதுமட்டுமின்றி நடிகர் சமுத்திரக்கனிக்கு சிறந்த துணை நடிகர் விருதும், கிஷோருக்கு சிறந்த எடிட்டர் விருதும் கிடைத்தது.

மேலும் ஆஸ்கார் செல்லும் இந்திய படங்களின் முதல் பட்டியலில் இந்த படம் இடம்பெற்றது. ஆனால் இரண்டாவது பட்டியலில் இடம்பெறாததால் ஆஸ்காருக்கு செல்ல முடியவில்லை. இருப்பினும் இந்த படம் வெனிஸ் நாட்டின் விருது உள்பட பல விருதுகளை பெற்றது.

வெற்றிமாறன் தற்போது தனுஷ் நடித்து வரும் 'வடசென்னை' என்ற படத்தை இயக்கி வருகிறார். இந்த படத்தின் முதல் பாகம் இந்த வருட இறுதியில் அல்லது அடுத்த வருடம் வெளிவரும் என்று எதிர்பார்க்கப்படுகிறது. இந்த படமும் தேசிய விருது உள்பட பலவிருதுகளை வென்று குவிக்க இந்த இனிய நாளில் வெற்றிமாறனுக்கு மீண்டும் ஒருமுறை எங்களது வாழ்த்துக்களை தெரிவித்து கொள்கிறோம்.