యంగ్ రెబల్ స్టార్ ప్రభాస్, జిల్ ఫేమ్ రాధాకృష్ణ కాంబినేష‌న్‌లో ఓ సినిమా రూపొందుతోన్న సంగ‌తి తెలిసిందే. యువీ క్రియేష‌న్స్‌, గోపీకృష్ణా మూవీస్ ప‌తాకాల‌పై నిర్మిత‌మ‌వుతోన్న ఈ చిత్రంలో పూజా హెగ్డే హీరోయిన్‌గా న‌టిస్తోంది. ఈ సినిమా తాజా షెడ్యూల్ జార్జియాలో పూర్త‌య్యింది. త‌దుప‌రి షెడ్యూల్‌ను ఇట‌లీలో చిత్రీక‌రించాల్సి ఉంది. అయితే ప్ర‌స్తుతం ప్ర‌పంచం వ్యాప్తంగా క‌రోనా వైర‌స్ సృష్టిస్తున్న బీభ‌త్సాన్ని గుర్తు పెట్టుకుని యూనిట్ హైద‌రాబాద్‌లోనే షూటింగ్‌ను పూర్తి చేయాల‌నుకుంటుంద‌ట‌. అందుకోసం ఇట‌లీలో ఓ హాస్పిట‌ల్లో చిత్రీక‌రించాల్సిన స‌న్నివేశాల కోసం హైద‌రాబాద్‌లోనే అలాంటి సెట్‌ను వేస్తున్నార‌ట‌.

ఇప్ప‌టికే అన్న‌పూర్ణ స్టూడియోలో ఈ సినిమాకు సంబంధించిన రెండు, మూడు సెట్స్ వేశారు. తాజాగా వీటితో పాటు హాస్పిట‌ల్ సెట్ కూడా వేయ‌బోతున్నార‌ని టాక్. పీరియాడిక‌ల్ ల‌వ్‌స్టోరీగా సినిమా తెర‌కెక్క‌నుంది. ఈ చిత్రానికి ముందుగా జాన్ అనే టైటిల్‌ను అనుకున్నారు కానీ.. అదే టైటిల్‌తో సినిమా వ‌చ్చేయ‌డంతో ఓ మైడియ‌ర్‌, రాధేశ్యామ్ అనే టైటిల్స్‌ను ప‌రిశీలిస్తున్నార‌ని టాక్‌. ఈ ఏడాది ద్వితీయార్థంలో సినిమాను విడుద‌ల చేయాల‌నే ద‌ర్శ‌క నిర్మాత‌లు భావిస్తున్నార‌ట‌. తెలుగు, త‌మిళ‌, హిందీ భాష‌ల్లో సినిమాను విడుద‌ల చేస్తున్నారు.