ஸ்லோ மோஷன் மட்டும் இல்லை என்றால், ரஜினிகாந்த் என்ற நடிகர் இல்லை என்று பிரபல இயக்குநர் ஒருவர் பேட்டி அளித்திருப்பது பரபரப்பை ஏற்படுத்தியுள்ளது.

சூப்பர் ஸ்டார் ரஜினிகாந்த் நடிக்கும் பல திரைப்படங்களில், அவரது மாஸ் காட்சிகள் ஸ்லோ மோஷன் ஆக காண்பிக்கப்படும். அப்போது, ரசிகர்கள் உற்சாகம் மிகுதியால் எழுந்து நின்று கை தட்டுவார்கள் என்பது தெரிந்ததே.

இந்த நிலையில், பிரபல இயக்குனர் ராம்கோபால் வர்மா சமீபத்தில் அளித்த பேட்டியில், "ரஜினிகாந்த் ஒரு சிறந்த நடிகரா? என்பது எனக்கு தெரியவில்லை. அவரை ஒரு நட்சத்திரமாக பார்க்கவே அனைவரும் விரும்புகிறார்கள். ஸ்லோ மோஷன் மட்டும் இல்லை என்றால், ரஜினிகாந்த் இருந்திருக்க முடியுமா என எனக்கு தெரியவில்லை.

ரஜினி பாதி படத்திற்கு மேல் எதுவும் செய்யாமல் நடப்பதை பார்த்து மகிழ்வதில் தவறில்லை. ரசிகர்கள் அவரை கடவுளைப் போல் பார்க்கிறார்கள். அதனால், அவரால் சாதாரண கதாபாத்திரங்களில் நடிக்க முடியாது; ஸ்டார் கேரக்டர்களில் மட்டுமே நடிக்க முடியும்," என்று தெரிவித்துள்ளார்.

ராம் கோபால் வர்மாவின் இந்த பேட்டிக்கு ரசிகர்கள் பதிலடி கொடுத்து வருகின்றனர். "முள்ளும் மலரும், ஆறிலிருந்து அறுபது வரை, எங்கேயோ கேட்ட குரல் போன்ற படங்களை ராம் கோபால் வர்மா பார்த்ததில்லை போல தெரிகிறது. அதனால்தான் ரஜினியின் நடிப்பை பற்றி அவருக்கு தெரியவில்லை. ரஜினியால் ஸ்டைல் நடிப்பு மட்டுமின்றி, சிறந்த கதாபாத்திரங்களிலும் நடிக்க முடியும்," என்று கூறி வருகின்றனர். இதனால் பரபரப்பு ஏற்பட்டுள்ளது.