இசைஞானி இளையராஜா சமீபத்தில் லண்டனில் சிம்போனி இசை கம்போஸ் செய்து சாதனை செய்த நிலையில், அவருக்கு தமிழக முதல்வர் முக ஸ்டாலின், ரஜினிகாந்த், கமல்ஹாசன் உள்பட பலர் வாழ்த்து தெரிவித்தனர்.

இந்த நிலையில் இசைஞானியை அடுத்து லிடியன் நாதஸ்வரம் சிம்பொனி இசைக்க இருப்பதாக தனது சமூக வலைத்தளத்தில் வீடியோ வெளியிட்டிருந்தார். அதில் சிம்பொனி இசைக்க தனக்கு இசைஞானி வாழ்த்து தெரிவித்ததாக கூறியிருந்தார்.

இதனையடுத்து இசைஞானி இளையராஜா, லிடியனுக்கு சிம்பொனி இசைக்க வழிகாட்டி வருவதாகவும் செய்திகள் வெளியானது. இந்த நிலையில், இது குறித்து இசைஞானி இளையராஜா விளக்கம் அளித்துள்ளார்.

"லிடியன் நாதஸ்வரம் என்னுடைய மாணவர் தான். என்னிடம் இசை கற்று வருகிறார். ஒருமுறை, சிம்போனி இசை அமைத்திருப்பதாக என்னிடம் வந்து இசைத்து காட்டிய போது, சில நொடிகள் கேட்டதுமே நான் நிறுத்தி விட சொல்லிவிட்டேன். இது சிம்போனி அல்ல, சினிமா பேக்ரவுண்ட் போல் இருக்கிறது," என்று அவருக்கு அறிவுரை கூறி, 'சிம்போனி என்றால் என்ன' என்பதை முதலில் கற்றுக் கொண்டு, அதன் பிறகு கம்போஸ் செய்யுங்கள்' என்று வழி காட்டினேன்," என்றும் தெரிவித்தார்.

மேலும், "இத்தனை வருடங்களாக இசைத்துறையில் சொந்த காலில் நான் நடந்து வருகிறேன். யாருடைய உதவியும் எனக்கு தேவையில்லை. அதேபோல், இன்றைய இளைஞர்களும் தங்களது சொந்த காலில், தங்களது முழு திறமையை வெளிப்படுத்த வேண்டும்," என்றும் அவர் தெரிவித்தார்.