முகநூல் மூலம் காதல் வலை: 6 பெண்களை திருமணம் செய்த ஐடி ஊழியர் கைது!
- IndiaGlitz, [Wednesday,December 09 2020]
முகநூல் மூலம் காதல் வலை வீசி 6 பெண்களை திருமணம் செய்த ஐடி ஊழியர் கைது செய்யப்பட்டு இருப்பது பெரும் பரபரப்பை ஏற்படுத்தி உள்ளது.
ஐதராபாத்தை சேர்ந்த ஐடி ஊழியர் விஜயபாஸ்கர். இவருக்கு கடந்த 2017 ஆம் ஆண்டு முதலாவது திருமணம் நடந்தது. இந்த நிலையில் மனைவி வீட்டில் இருக்கும் போதே அவர் முகநூல் மூலம் இளம் பெண்களுக்கு காதல் வலை வீசினர். குறிப்பாக ஐடி துறையில் உள்ள இளம் பெண்கள் வசதியாக இருப்பார்கள் என்ற காரணத்தினால் அவர்களுக்கு காதல் வலை வீசியுள்ளார்.
அவருடைய முகநூல் காதல் வலையில் தொடர்ச்சியாக ஐந்து பெண்கள் ஏமாந்துள்ளதாகவும், அவர்களிடம் ஆசை வார்த்தை காட்டி திருமணம் செய்து சில நாட்கள் அவர்களுடன் வாழ்ந்துவிட்டு பின் அவர்களிடம் இருந்த பணம் மற்றும் நகைகளை பறித்துக் கொண்டு எஸ்கேப் ஆகி வந்தார்.
அந்த வகையில் சமீபத்தில் அவர் ஆறாவதாக சவுஜன்யா என்ற பெண்ணை முகநூல் மூலம் பழகி திருமணம் செய்துள்ளார். தனது கணவர் அடிக்கடி காரில் உட்கார்ந்து கொண்டு செல்போனை நோண்டிக் கொண்டு இருப்பதை பார்த்து சந்தேகமடைந்த சவுஜன்யா, விஜயபாஸ்கர் இல்லாத போது அவருடைய செல்போனை எடுத்து பார்த்தபோது அதில் சிவானி என்ற பெண்ணிற்கு வீடியோ அனுப்பி ஏழாவது திருமணம் செய்ய முயற்சிப்பதை கண்டு அதிர்ச்சி அடைந்தார்.
இதனை அடுத்து அவர் தனது பெற்றோர் மற்றும் உறவினர்களிடம் இதுகுறித்து கூறியதை அடுத்து சவுஜன்யாவின் உறவினர்கள் விஜயபாஸ்கரை அடித்து உதைத்து அவரிடம் இருந்து உண்மையை வரவழைத்தனர்.
அதன் பின்னர்தான் முகநூல் மூலம் காதல் வலை வீசி 6 பெண்களை திருமணம் செய்ததை விஜயபாஸ்கர் ஒப்புக்கொண்டார் இதனை அடுத்து ஹைதராபாத் போலீசாரிடம் அவர் ஒப்படைக்கப்பட்டார். இதனை அடுத்து அவரால் பாதிக்கப்பட்ட பெண்களிடம் புகார் பெரும் பணியில் தற்போது போலீசார் உள்ளனர்.
முகநூல் மூலம் அடுத்தடுத்து 6 பெண்களை ஏமாற்றி திருமணம் செய்து அவர்களிடமிருந்து பணம் மற்றும் நகைகளை பறித்த ஐடி ஊழியர் ஒருவர் கைது செய்யப்பட்டு இருப்பது பெரும் பரபரப்பை ஏற்படுத்தி உள்ளது.