Kavitha: లిక్కర్ స్కాంలో కవిత బెయిల్ పిటిషన్‌పై తీర్పు రిజర్వ్
- IndiaGlitz, [Thursday,April 04 2024]
లిక్కర్ స్కాంలో అరెస్టైన బీఆర్ఎస్ ఎమ్మెల్సీ కవిత బెయిల్ పిటిషన్‌పై తీర్పును కోర్టు రిజర్వ్ చేసింది. ప్రస్తుతం తిహార్ జైలులో ఉన్న ఆమె మధ్యంతర బెయిల్ పిటిషన్‌పై ఢిల్లీలోని రౌస్ అవెన్యూ కోర్టులో విచారణ జరిగింది. కవిత తరపున సీనియర్ న్యాయవాది అభిషేక్ సింఘ్వి వాదనలు వినిపించగా.. ఈడీ తరపున జోసెఫ్ హుస్సేన్ వాదించారు. విచారణ సందర్భంగా కోర్టులో వాడీవేడి వాదనలు జరిగాయి.
16 ఏళ్ల వయసున్న కవిత చిన్న కుమారుడికి పరీక్షలు ఉన్నాయని ఆమె తరపు న్యాయవాది తెలిపారు. తల్లి అరెస్ట్ అయిందన్న ఆందోళనలో కుమారుడు ఉన్నాడని.. ఈ సమయంలో తల్లి పక్కనే ఉంటే కొంత మోరల్ సపోర్ట్ ఉంటుందన్నారు. ఏప్రిల్ 16వ తేదీ వరకు పరీక్షలు ఉన్నందున కచ్చితంగా మధ్యంతర బెయిల్ ఇవ్వాలని లేదంటే షరతులతో కూడిన బెయిల్ ఇచ్చినా తమకు ఎలాంటి అభ్యంతరం లేదని సింఘ్వి వాదనలు వినిపించారు.
ఇదే సమయంలో కవిత బెయిల్ పిటిషన్ తిరస్కరించాలని ఈడీ తరపు న్యాయవాది గట్టిగా వాదించారు. లిక్కర్ స్కామ్‌లో కవిత ప్రధాన సూత్రధారి అని.. కవితకు బెయిల్ ఇస్తే సాక్ష్యాలను తారుమారు చేయగల వ్యక్తి అని తెలిపారు. అవినీతి కార్యకలాపాలతో పాటు లిక్కర్ కేసుకు మూలమైన కవితకు బెయిల్ ఇవ్వకూడదని కోరారు. ఇరు పక్షాల వాదనలు విన్న న్యాయస్థానం తీర్పును సోమవారం ఉదయానికి రిజర్వ్ చేసింది. అలాగే సాధారణ బెయిల్ పిటిషన్‌పై ఏప్రిల్ 20న విచారణ చేపడతామని పేర్కొంది.
కాగా మార్చి 15న ఈ కేసులో కవిత అరెస్ట్ అయిన సంగతి తెలిసిందే. అప్పటి నుంచి 10 రోజుల పాటు ఈడీ కస్టడీలో ఉండగా తర్వాత జ్యుడిషియల్ కస్టడీకి మారారు. ఇందులో భాగంగా తిహార్ జైలులో రిమాండ్ ఖైదీగా ఉంటున్నారు. లిక్కర్ స్కాంలో కవితదే కీలక పాత్ర అని రూ.100కోట్లు చేతులు మారాయని ఈడీ అధికారులు ఆరోపిస్తున్నారు. ఇదే కేసులో ఢిల్లీ సీఎం కేజ్రీవాల్‌ కూడా అరెస్టై తిహార్ జైలులోనే ఉంటున్నారు.