கடந்த 1993 ஆம் ஆண்டு ’ஜுராசிக் பார்க்’ என்ற திரைப்படம் டைனோசர் குறித்து வெளியானது என்பதும், இந்த படம் உலகம் முழுவதும் மிகப்பெரிய வரவேற்பை பெற்றது என்பதும் தெரிந்தது.

அதன் பின்னர், டைனோசர் குறித்த பல படங்கள் வெளியான நிலையில், தற்போது இன்னொரு படமாக ‘ஜூராசிக் வேர்ல்ட் ரீபர்த்’ என்ற படத்தின் ட்ரைலர் வெளியாகியுள்ளதை அடுத்து, இந்த படத்தின் ரிலீஸ் தேதியும் அறிவிக்கப்பட்டுள்ளது.

கடந்த 90களில் தொடங்கி ’ஜுராசிக் பார்க்’ திரைப்படங்கள் வரிசையாக வெளியாகி மிகப்பெரிய வெற்றி பெற்றன. குறிப்பாக, ஜுராசிக் பார்க் திரைப்படமே மூன்று பாகங்கள் வெளியான நிலையில், தற்போது புதிய பரிமாணத்தில், புதிய கதை அம்சத்துடன் ‘ஜூராசிக் வேர்ல்ட் ரீபர்த்’ என்ற திரைப்படம் உருவாக்கப்பட்டுள்ளது.

மனித இனத்தின் உயிரியல் ரீதியான முன்னேற்றத்திற்கு, டைனோசர்களிடமிருந்து டிஎன்ஏ எடுக்க வேண்டும் என்ற ஒரு ஆராய்ச்சி குழு டைனோசர்கள் வாழும் தீவுகளுக்கு செல்கின்றனர். அந்த தீவுக்கு சென்று, டைனோசர் முட்டையிலிருந்து டிஎன்ஏவை எடுக்கும் போது ஏற்படும் பிரச்சனைகள் என்ன? டைனோசர்களிடம் அவர்கள் மாட்டிக்கொண்ட பின், அவர்கள் உயிருடன் தப்புகிறார்களா என்பது தான் இந்த படத்தின் கதை.

ஒவ்வொரு ஜுராசிக் படத்திலும் புதிய டைனோசர்கள் பிரம்மாண்டமாக அறிமுகமாகும் நிலையில், இந்த படத்திலும் ஒரு புதிய டைனோசர் அறிமுகமாகும் என்று எதிர்பார்க்கப்படுகிறது.

இந்த படத்தின் ட்ரெய்லர் வெளியாகியுள்ள நிலையில், இந்த படம் ஜூலை 4 ஆம் தேதி திரையரங்குகளில் வெளியாகும் என அறிவிக்கப்பட்டுள்ளது. இந்தியாவில் தமிழ், தெலுங்கு, ஹிந்தி மற்றும் ஆங்கிலம் ஆகிய நான்கு மொழிகளில் இந்த படம் வெளியாகும் என அறிவிக்கப்பட்டுள்ளது.