தமிழ் திரை உலகை பொறுத்தவரை மாஸ் நடிகர்களின் திரைப்படங்கள் ரிலீஸ் ஆகும்போது அந்த படத்தில் நடித்த ஹீரோ, ஹீரோயின் உள்பட படக்குழுவினர் முதல் நாள் முதல் காட்சி அன்று திரையரங்குக்கு வந்து ரசிகர்களோடு ரசிகர்களாக படம் பார்க்கும் நிகழ்வுகள் நடந்து வருகின்றன என்பதை பார்த்து வருகிறோம்.

இருப்பினும் ரஜினி, அஜித்,விஜய் போன்ற நடிகர்கள் திரையரங்குக்கு வந்து படம் பார்ப்பது இல்லை என்பது தெரிந்ததே. ஆனால் விஜய் மட்டும் மாறுவேடத்தில் வந்து படம் பார்ப்பதாக ஒரு சிலர் கூறுவதுண்டு.

இந்த நிலையில் கமல்ஹாசன் நடித்த ’விக்ரம்’ திரைப்படம் வரும் 3ஆம் தேதி உலகம் முழுவதும் திரையரங்குகளில் வெளியாக உள்ள நிலையில் சென்னையிலுள்ள ரோகிணி திரையரங்கில் கமல்ஹாசன் அதிகாலை 4 மணி காட்சியை பார்க்க வருகை தர இருப்பதாக தகவல்கள் வெளியாகியுள்ளன. இதனை அடுத்து அன்றைய தினம் 4 மணிக்கு காட்சியை ரோகிணியில் பார்க்கும் ரசிகர்கள் கமல்ஹாசனை நேரில் சந்திக்க வாய்ப்புள்ளது.

கமல்ஹாசன், விஜய்சேதுபதி, பகத் பாசில், நரேன், அர்ஜூன் தாஸ், ஹரிஷ் உத்தமன், காயத்ரி ஷங்கர், ஷிவானி நாராயணன், ஷான்வி ஸ்ரீவத்சவா, ஜி மாரிமுத்து, ரமேஷ்திலக் உள்பட பலர் நடித்துள்ளனர். அனிருத் இசையில் கிருஷ் கங்காதரன் ஒளிப்பதிவில் ஃபிலோமினா ராஜ் படத்தொகுப்பில் உருவாகியிருக்கும் இந்த படத்தை ராஜ்கமல் பிலிம்ஸ் இண்டர்நேஷனல் நிறுவனம் தயாரித்துள்ளது.