எத்தனை நிவாரணம் கிடைத்தாலும் ஈடு செய்ய முடியாது: கமல்ஹாசன் அறிக்கை
- IndiaGlitz, [Tuesday,December 03 2019]
மேட்டுப்பாளையத்தில் நேற்று சுற்றுச்சுவர் இடிந்ததால் 17 பேர் பலியான சம்பவம் அனைவரையும் உலுக்கிய நிலையில் இந்த சம்பவம் குறித்து சிலர் உண்மையாகவே கண்டனம் தெரிவித்தும் சிலர் அரசியல் செய்யவும் அறிக்கைகளை வெளியிட்டு வருகின்றனர். இந்த நிலையில் மக்கள் நீதி மய்யம் கட்சியின் தலைவரும் உலக நாயகனுமாகிய கமல்ஹாசன் நேர்மையாக, அரசியல் செய்யாமல் ஒரு அறிக்கையை வெளியிட்டுள்ளார். அந்த அறிக்கையில் அவர் கூறியிருப்பதாவது:
கோவை மாவட்டம், மேட்டுப்பாளையத்தில் பெய்த கடும் மழையில் இடிந்த கற்சுவர் அருகில் இருந்த வீடுகளில் விழுந்ததால் நான்கு வீடுகளில் இருந்த 17 பேர் உயிரிழந்த அதிர்ச்சியான செய்தி கேட்டு மிகவும் துயருற்றேன்
இது ஒரு விபத்தென்றாலும், இதில் ஏதேனும் தவறு நடந்திருக்குமாயின் அரசும் காவல்துறையும் அதை நேர்மையுடன் அணுகி பாதிக்கப்பட்ட மக்களுக்கு நீதி கிடைக்க ஆவன செய்ய வேண்டும். எத்தனை நிவாரணம் கிடைத்தாலும் இந்த இழப்பை ஈடு செய்ய இயலாது.
இருப்பினும் அவர்களின் துயரில் நானும் பங்கேற்கிறேன். வரும் மழைக்காலங்களில் மக்கள் கவனத்துடனும், அரசு முன்னெச்சரிக்கையுடனும் இருந்து பெரும் சேதம் ஏற்படாத வகையில் நடவடிக்கைகள் இருந்திட வேண்டுமென கேட்டுக்கொள்கிறேன்
இவ்வாறு கமல்ஹாசன் தனது அறிக்கையில் தெரிவித்தார்.