திரும்ப திரும்ப ஆதரவு கேட்க முடியாது: ரஜினி ஆதரவு குறித்து கமல்
- IndiaGlitz, [Monday,April 08 2019]
தனது கட்சிக்கு வரும் மக்களவை தேர்தலில் ரஜினிகாந்த் ஆதரவு தெரிவிப்பார் என நம்புவதாக கமல்ஹாசன் சமீபத்தில் அளித்த பேட்டியில் கூறியிருந்தார். இருப்பினும் கமலுக்கு மட்டுமின்றி வேறு யாருக்கும் இதுவரை ரஜினி ஆதரவு தெரிவிக்கவில்லை. கடந்த பிப்ரவரி மாதம் அவர் வெளியிட்ட அறிக்கையில் 'தண்ணீர் பிரச்சனையை தீர்க்கும் கட்சிக்கு ஓட்டு போடுங்கள்' என்று மட்டும் தனது ரசிகர்களுக்கு அறிக்கை மூலம் அறிவுறுத்தினார்.
இந்த நிலையில் தனது கட்சிக்கு யார் ஆதரித்தாலும் மகிழ்ச்சி என்றும், ரஜினி ஆதரித்திருந்தால் இன்னும் மகிழ்ந்திருப்பேன் என்றும் கமல்ஹாசன் இன்று அளித்த பேட்டி ஒன்றில் தெரிவித்தார். என்னை ஆதரிப்பதாக ரஜினிதான் வெளிப்படுத்த வேண்டுமே தவிர, திரும்ப திரும்ப நான் கேட்கக்கூடாது என்றும் அவர் கேள்வி ஒன்றுக்கு பதிலளித்தார்,.
மேலும் அரசியலுக்கு வருகிறேன் என்று ரஜினி கூறினார். ஆனால் இன்னும் அவர் வரவில்லை என்று கூறிய கமல்ஹாசன், ரஜினியை என் பாதி வாழ்க்கையில் தான் தெரியும், ஆனால் மக்களை 4 வயதில் இருந்து எனக்கு தெரியும் என்றும் மக்கள் எனக்கு ஆதரவு தருகிறார்கள் அது போதும் என்றும் அவர் மேலும் கூறினார்.