'கரகாட்டக்காரன்' புகழ் சண்முகசுந்தரம் காலமானார்
- IndiaGlitz, [Tuesday,August 15 2017]
பழம்பெரும் குணசித்திர நடிகர் சண்முகசுந்தரம் இன்று காலமானார். கடந்த சில நாட்களாக உடல்நலமின்றி இருந்த அவர் சிகிச்சையின் பலனின்றி காலமானார்.
கடந்த 1963ஆம் ஆண்டு சிவாஜிகணேசன் நடித்த ரத்தத்திலகம்' படத்தில் அறிமுகமான சண்முகசுந்தரம் ஆரம்பகட்டத்தில் நெகட்டிவ் கேரக்டர்களில் நடித்திருந்தாலும் அதன் பின்னர் குணசித்திர வேடத்தில் தனது வித்தியாசமான வசன உச்சரிப்பால் அனைவரையும் கவர்ந்தார். குறிப்பாக கங்கை அமரன் இயக்கத்தில் ராமராஜன் நடித்த சூப்பர் ஹிட் படமான 'கரகாட்டக்காரன்' படத்தில் கனகாவின் தந்தையாக நடித்து அனைவரின் கவனத்தையும் பெற்றார். இந்த படத்தில் அவருடைய நடிப்பு இன்றும் அனைவரின் நினைவிலும் இருக்கின்றது.
வெங்கட்பிரபுவின் 'சென்னை 600028' படத்தில் டாஸ் வென்ற அணியிடம் 'பீல்டிங்கா பெளலிங்கா' என்று இவர் கேட்கும் நகைச்சுவை இன்று நினைத்தாலும் சிரிப்பு வரும் வகையில் இருக்கும். தமிழ்ப்படம், மாஸ் உள்பட பல திரைப்படங்களில் நடித்த சண்முகசுந்தரம் நடித்த கடைசி படம் சிம்புவின் 'அன்பானவன் அசராதவன் அடங்காதவன்' படம் என்பது குறிப்பிடத்தக்கது.
பழம்பெரும் நடிகர் சண்முகசுந்தரம் அவர்களின் மறைவிற்கு IndiaGlitz ஆழ்ந்த இரங்கலை தெரிவித்து கொள்வதுடன் அவருடை ஆத்மா சாந்தியடைய பிரார்த்தனையும் செய்கிறது.