లేడీ విలన్‌తో బాలయ్య ఢీ..?
- IndiaGlitz, [Friday,April 10 2020]
నంద‌మూరి బాల‌కృష్ణ హీరోగా న‌టిస్తోన్న 106 చిత్రం చిత్రీక‌ర‌ణ ద‌శ‌లో ఉంది. బోయపాటి శ్రీను ద‌ర్శ‌క‌త్వంలో సినిమా తెర‌కెక్కుతోంది. తొలి షెడ్యూల్ పూర్త‌యిన ఈ సినిమా కరోనా వైరస్ ప్ర‌భావం షూటింగ్‌ను ఆపేసింది. కరోనా ప్ర‌భావం త‌గ్గిన త‌ర్వాత సినిమా కొత్త షెడ్యూల్ ప్రారంభం కానుంది. కాగా.. తాజా స‌మాచారం మేర‌కు ఈసినిమాలో ఓ లేడీ విల‌న్ న‌టించ‌నుంద‌ని టాక్‌. ఆమె ఎవ‌రో కాదు... భూమిక.
గ‌తంలో చిరంజీవి, ప‌వ‌న్‌క‌ల్యాణ్‌, వెంక‌టేశ్‌, నాగార్జున, ఎన్టీఆర్‌, మ‌హేశ్‌ల‌తో క‌లిసి న‌టించిన భూమిక ఇప్ప‌టి వ‌ర‌కు బాల‌కృష్ణ‌తో హీరోయిన్‌గా న‌టించలేదు. ఆయన గ‌త చిత్రం రూల‌ర్‌లో ఓ కీలక పాత్ర‌లో మాత్ర‌మే క‌న‌ప‌డింది. ఇప్పుడు మ‌రోసారి బాలయ్య సినిమాలో న‌టించ‌నుంద‌ట. అది కూడా లేడీ విల‌న్ పాత్ర‌లో అంటున్నారు. సింహా, లెజెండ్ చిత్రాల త‌ర్వాత బాలయ్య, బోయపాటి కాంబినేష‌న్‌లో తెర‌కెక్కుతోన్న మూడో చిత్ర‌మిది. భారీ అంచ‌నాలున్నాయి. ఈ చిత్రంలో బాలయ్య రెండు పాత్ర‌ల్లో న‌టిస్తున్నారు.