சூப்பர் ஸ்டார் ரஜினிகாந்த் நடிப்பில், லோகேஷ் கனகராஜ் இயக்கத்தில் உருவாகி வரும் ‘கூலி’ படத்தின் படப்பிடிப்பு விறுவிறுப்பாக நடைபெற்று வருகிறது. இன்னொரு பக்கம், படத்தின் தொழில்நுட்ப பணிகள் முடிவுறும் நிலையில் உள்ளதாக தகவல்கள் வெளியாகியுள்ளன.

இந்த நிலையில், இன்னும் ஒரு மாதத்திற்குள் படத்தின் ஒட்டுமொத்த படப்பிடிப்பும் முடிந்து விடும் என கூறப்படுகிறது. இதற்கிடையில், ரஜினிகாந்த் ‘ஜெயிலர் 2’ படத்தின் படப்பிடிப்பிலும் கலந்து கொண்டுள்ளார் என தகவல்கள் வெளியாகியுள்ளன.

மேலும், மார்ச் 14ஆம் தேதி, இயக்குனர் லோகேஷ் கனகராஜின் பிறந்தநாளை முன்னிட்டு, ‘கூலி’ படத்தின் டீசர் வெளியிடப்பட உள்ளதாக தகவல் கிடைத்துள்ளது. இதற்கான அதிகாரப்பூர்வ அறிவிப்பு இன்று மாலை அல்லது நாளை வெளியாகும் என்று கூறப்படுகிறது.

ரஜினிகாந்த், நாகார்ஜுனா, ஸ்ருதிஹாசன், சத்யராஜ், உபேந்திரா, ஷோபின் ஷாஹிர் உள்ளிட்ட பலர் நடித்துள்ள ‘கூலி’ திரைப்படத்தை சன் பிக்சர்ஸ் நிறுவனம் தயாரித்து வருகிறது. அனிருத் இசையமைக்கும் இந்த படத்திற்கு, கிரிஷ் கங்காதரன் ஒளிப்பதிவு செய்துள்ளார். படத்தொகுப்பை பிலோமின் ராஜ் கவனிக்கிறார்.