'தல' தோனி இன்றும் மக்கள் கேப்டன் தான். ஒரு நெகிழ வைக்கும் சம்பவம்
- IndiaGlitz, [Friday,March 03 2017]
திரையுலகில் உள்ள தல நடிகராக மட்டுமின்றி நல்ல மனிதநேயமிக்கவராக இருப்பது போலவே கிரிக்கெட் தல என்று அழைக்கப்படும் தோனி, சிறந்த கேப்டனாக இருந்து அனைவரின் மனதையும் வென்றது மட்டுமின்றி சிறந்த மனிதர், நட்புக்கு முக்கியத்துவம் கொடுப்பவர் என்பது சமீபத்திய நெகிழ வைக்கும் சம்பவங்களால் தெரியவந்துள்ளது.
தல தோனி சமீபத்தில் ஜார்கண்ட் அணியினர்களுடன் போட்டி ஒன்றில் விளையாட ரயிலில் சென்று, அதுகுறித்த புகைப்படத்தை சமூக வலைத்தளங்களில் பதிவு செய்தார் என்பதை தெரிந்ததே. இந்நிலையில் இந்த போட்டியில் வெற்றி பெற்றவுடன் டிரஸ்ஸிங் அறையில் அவர் சக வீரர்களுடன் தல தோனி பேசி கொண்டிருந்தபோது தனது பழைய நண்பர் ஒருவர் தன்னை பார்க்க வந்திருக்கின்றார் என்று தெரிந்தவுடன் உடனே அவரை கட்டிப்பிடித்து தன் அன்பை வெளிப்படுத்தியுள்ளார். நீண்ட நாட்களாக எந்தவித தொடர்பும் இல்லாமல் இருந்தும் தோனி தன்னை ஞாபகப்படுத்தி வரவேற்றதில் அந்த நண்பர் அடைந்த ஆச்சரியத்திற்கு அளவே இல்லை
காராக்பூரில் டீக்கடை வைத்திருக்கும் தாமஸ் என்ற அந்த நண்பரை உடனே தான் தங்கியிருக்கும் ஓட்டலுக்கு உடன் அழைத்து சென்று அவருக்கு ஸ்பெஷல் உணவு வாங்கி கொடுத்துள்ளார். மேலும் இந்த பயணத்தில் அவர் தனது பல பழைய நண்பர்களை சந்தித்து அவர்களுடன் தன்னுடைய மலரும் நினைவுகளை பகிர்ந்துள்ளார். ஒவ்வொருவருடன் தனித்தனியாக புகைப்படம் எடுத்து அவர்களை மகிழ்விக்க செய்துள்ளார்.
இந்த சந்திப்பு குறித்து தோனியின் பால்ய நண்பர் தாமஸ் கூறியபோது, 'தோனி காராக்புரில் இருந்தபோது தினமும் இரண்டு அல்லது மூன்று முறை என்னுடைய டீக்கடைக்கு வருவார். பலமுறை அவருக்கு நான் சூடான பால் பருக அளித்துள்ளேன். இன்றைய சந்திப்பு எனக்கு மிகுந்த மகிழ்ச்சி அளித்துள்ளது. நான் நேராக ஊருக்கு சென்று முதல் வேலையாக என்னுடைய டீக்கடைக்கு 'தோனி டீ ஸ்டால்' என்று மாற்ற உள்ளேன்' என்று கூறியுள்ளார். தல தோனிக்கு இந்திய கிரிக்கெட் அணியின் கேப்டன் பதவி போனாலும் மக்கள் மனதில் அவர் இன்றும் என்றும் கேப்டன் தான்.